Vawiin khan Mizoram Governor Lt Gen (Rtd) Nirbhay Sharma, PVSM, UYSM, AVSM, VSM leh Mizoram tlawha lo kal Chin Youth Organisation (CYO), Myanmar palaite chuan Raj Bhawan-ah inkawmhona an nei a. CYO palaite lo zin mekte hi mi 18 - mipa 10 leh hmeichhia 8 - an ni a, Governor hmu tura lo kal palai zinga mi 5 te chu CYO President Pu Jacob Thang-in a rawn ho a ni.

Mizoram Governor chuan CYO palaiten Mizorama rawn zin a, Mizoram khawtlang leh sorkar inrelbawldan zirchiang a, zirna leh hriselna lama hmalakna hrang hrangte rawn hmelhriat an duh chu lawmawm a tih thu a hrilh a. India leh Myanmar ramri chu ‘soft border’ a nih angin a lehlam ve vea mi chengte pawh innel tak leh zalen taka inkalpawh theih a ni a, hei hi ram pahnihte inkara thawhhona leh inrhiatthiamna a titha hlea a hriat thu a sawi bawk. Mizoram ang thovin Chin ho pawh tawng an thiam belh chu an hmasawnna zel turah a tangkai a rin thu hrilhin zirna, hriselna bakah ruihlo do kawngah inthlawp zela tanrual a pawimawh a tih thu a hrilh bawk.

CYO palaite chuan Mizoram Governor nen inkawmna hun tha tak an nei thei chu lawmawm an tih thu an hrilh a, Mizoram khawtlang nunphung leh inrelbawl dan bakah khawpui, thingtlang leh district lama sorkar inrelbawl leh hmasawnna kalpui a nih dante rawn zir an nih thu an hrilh bawk a. MZU hnuaia History Department bakah MHIP, PHE leh CYMA te nen inkawmna hun tha tak an neih chu bengvarthlak an tih hle thu an sawi bawk. MZU leh an rama University-te nen thawhhona kawng pawh an dap dawn tih sawiin an zirlaiten MZU-ah research rawn bei thei tura hmalak an tum thu an sawilang bawk a ni.