No.5167/2020-2021 

Nimin 16/09/2020 (Wednesday) chawhnu khan Lunglei DC leh DLTF Chairman ni bawk Pu V.Lalsangliana, IAS kaihhruaiin Excise & Narcotics Department Conference Hall-ah Lunglei Town Area huamchhunga VLTF Chairman (VCP) leh Vice Chairman (President, Branch YMA) te meeting neihpui an ni. Meeting-ah hian Lunglei CMO Dr Lalthlamuana, Medical Superintendent DR SR Ngurchamliana, Addl DC Pu R. Vanrengpuia leh DLTF member dangte an tel a ni.

Chairman Pu V.Lalsangliana chuan COVID-19 hri leng vanga inkhuahkhirhna chu mimal eizawnna leh mipuite harsatna sut kian a nih theih nana thlahdul deuh a nih rualin, mipuite tan fimkhur zual sauh a tul thu a sawi a.  VLTF Chairman thar (VCP thar) te chu an mawhphurnate hrilhfiahin Covid-19 hrileng do kawnga hmalakna kal zelah kawng engkima thawhho puiah a sawm a. Lunglei DC chuan “Covid-19 hrileng hian Mizoram min luhchhuah mek avangin mitin te kan inralrin a tul zual hle a, Lunglei District mipuite pawh kan fimkhur thar zela kan inbuatsaih thar reng a tul a ni" tiin VLTF hruaitute chu ngaihtuahna fim tak nena hma la thin tur leh mi harsa zawkte eizawnna ti buai lo zawnga rorel thin turin a chah a. Covid-19 hrileng do naah a hmatawnga awm an nih avangin VLTF hruaitute chu an fimkhur hle a tul thu sawiin a theih chin chinah phone kaltlang  leh mahni awm hmun atanga rorel thin turin a chah bawk.

Meeting-ah hian Town area VLTF Chairman leh Vice Chairman te hian anmahni veng theuha harsatna an neihte leh hmalak tul te tarlangin sawihona hun tha tak hman a ni a. Lunglei District-ah Covid-19 vei te enkawlna CCC chungchang te pawh sawiho niin CCC-SIRD, Pukpuiah khum 32 awmin CCC- Zobawk PHC ah khum 20 a awm a.  Mi 100 enkawl theihna tur ruahman turin hma la mekin CCC Building thar sakna atan cheng nuai sawmriat panga (85 lakhs) estimate siam niin hei hi HPC Lunglei kaltlangin sawrkar hotute hnenah thehluh anih thu Lunglei CMO Dr Lalthlamuana chuan a sawi a. Sawrkar thuchhuah angin VLTF-ten mahni vengah Lockdown an puang ngawt theihloh thu pawh tarlan niin harsatna emaw emergency an nei anih chuan DLTF hnenah thlen vat thin tura hriattir an ni.