Vawiin khan District Industrial Centre (DIC) leh KVI buatsaihin DIC Hall, Lunglei-ah ‘Training for Entrepreneurship Development Programme for PMEGP Beneficiaries’ chu Lunglei Bawrhsap Pu Ashsish madhaorao More, IAS in a hawng.

Training hawnna inkhawm DIC Lunglei General Manager Pu Lalnuntluanga kaihhruaiah Lunglei Bawrhsap Pu Ashish More chuan thu sawiin PMEGP chu sorkar laipui programme pawimawh berte zinga mi a nih thu leh mi zawng zawngin sorkar hna an thawk thei dawn lo avangin sorkarin mahni intundinna atan PMEGP hi a duang a ni, a ti a. Training chhuakte chu PMEGP kaltlangin loan an la thei dawn a, tangkai taka hmang a, peipun dan turte inngaihtuah chiang turin a chah a. Hetianga training chhuakten eizawnna ngelnghet an nei thei chuan midangte tan pawh eizawnna hna an siam sak thei zel dawn a, Mizoram sum leh pai dinhmun pawh a that phah sawt a rin thu a sawi a ni. Eizawnna kawnga hlawhtlinna an duh chuan taimakna leh rinawmna a pawiawh a ni tih hre reng turin trainees-te a hrilh a ni.

He Entrepreneurship Training atan hian mi 43 thlanchhuah an ni.