Mizoram sorkar leh UN Agency te thawh hona tur hmalakna chhawp chhuahte zirchiang tura cham mek UN Team-te chuan vawiin tlai khan Chief Minister Pu Lal Thanhawla chu a chenna inah hmu in an lo zin chhan leh thil hmuh huam zau takin an sawiho.

Anmahni lo dawngsawngtu Chief Minister chuan UN Team-te chu Mizoram mamawh hrang hrangte enpui a, kalphung tha zawk siampui a, hmasawnna chak zawka kalpui a nih theihna tur leh an thiamna Mizoram tana tangkai taka hman a nih theih nan inkawprem taka an thawhho theih zel a beisei thu a lo hrilh a. Vawiina sorkar mipawimawh hrang hrangte an kawmnaah Mizoram an hmuh dan Chief Minister-in a zawhna chhangin UN Technical Mission Team aiawh Dr Peter E Kenmore chuan khawvel hmun hrang hranga hmalakna an lo neih tawh atanga a tha lai te thlang chhuakin, Mizoram mipuite nen tang tlanga ei leh bara intodelhna mai bakah sik leh sa, tui, boruak leh leilung chhe mek siam thatna kawngah Mizoram chuan chak taka hma a sawn ngei a beisei thu a sawi.

Chief Minister sawmna anga lo zin UN Technical Mission Team te hian Mizoram hmasawnna tur ngaihtuahin UN agency te nena thawk hova sorkar laipui atanga fund hmuh theihna tur leh harsatna Mizoramin a tawhte zir chiang a, a sutkian dan kawng ngaihtuah turin an lokal a. Ram pawn international funding agency atanga sum kan hailuh theih nan heng funding agency hote duhdana project siampui tur leh Mizorama thalai hna hmulo te tana Mizoram State Skill Development Mission buaipui te chu an lokal chhan pawimawh tak a ni.

UN Team member te hi UNO agency hrang hrang FAO, ILO, UNDP leh UNIDO aiawhte niin Dr Peter E. Kenmore-a'n a rawn ho a ni.

Vawiin vek khan UN Team te hian PWD Engineer-in-Chief R.Vanlaltluanga leh a thawhpuite hmu in skill development a thawh ho dan tur an sawi hova. PWD hotute hian an hnathawh leh kutchhuakte a lo that zawk nan EE chin hnuai lam tan technical skill training tam zawk an mamawh thu an sawi a. Dr Peter Kenmore chuan Mizoram chu skill development ah tanpui an mamawhzia hriain hmalakpui dan tur leh pawn lam atanga mithiam training pe thei tur hruai luh dan kawng a ngaihvensak tur thu a hrilh a ni.