Printing & Stationery Minister Pu C. Ngunlianchunga chuan vawiin tlai khan a pisaah Printing & Stationery Department Website a hawng. P&S Dept. website thar, printingstationery.mizoram.gov.in ah hian eGazette leh press leh stationery kaihhnawih leh thildang pawimawh zawlsam taka hmuh theihin a awm a ni.
Minister Pu C. Ngunlianchunga chuan website thar Printing & Stationery Department in a neih chu hmasawnna rahbi ropui tak a ni a ti a. Website siam hna thawktute zawng zawng chungah lawmthu sawiin, mipuiin an hman tangkai a beisei thu a sawi bawk a. Khawvel hmun hrang hrang atangin a duh te chuan Mizoram Gazette chu an lo chhiar thei tawh tur chu rahbi pawimawh tak pakhat a ni, a ti. P&S Dept. hmalakna dangte Minister chuan sawilangin, NLCPR hnuaia printer lian bun chhoh mek chu hman theih a nih hunah chuan phai lama pawisa tam tak senga zirlaibu leh thildang chhut ngai thinte chu P&S Dept. khawl hmangin, sum sen tur tam tak a hlep theih dawn a ni, a ti.
Website hawnna hun hi P&S Secretary Pu K. Rohmingthanga’n kaihruaiin, Asst. Manager (DTP) leh Web Information Manager ni bawk Er. V.L. Muanchhana chuan website chungchang hi report a pe a. Website hi Information & Communication Technology Department in a host a, design leh maintenance hi P&S Dept. hnuaia Website Management Team kutah awmin, website developer atan Lancis Software hman an ni.
P&S website-ah hian e-Gazette section awmin, Mizoram Gazette chu en leh lakchhawn (download) theih a ni a, kumin 2014 atanga Mizoram Sorkar Gazette-te chu dahluh zel a ni a. A hrana P&S Office-a lam ngai lova, mahni in lum atanga en theih maia siam niin, awlsam takin zawn (search) theih a ni bawk.
Gazette bakah hian printing rate leh a kaihhnawih te pawh online-a estimate theih mai turin dahchhuah a ni a, heng bakah hian stationery lam thil hrang hrangte a man zat dah luh a ni bawk. Tunah hian stationery items atana approved items leh approved firms tur atan dilna hawn mek a ni a. Hemi chungchang pawh hi website-ah hian kimchang taka hmuh theih a ni.
Vawiin website hawnna hunah hian Printing & Stationery Dept. leh department dang atangin Officer pawimawh te an tel a ni.
