National Mission on Food Processing, Industries Department-in a vawikhatna atana Lunglei Children's Park-a a buatsaih 'Food Fest' chu vawiin khan a ni tawp ber hman a ni a, a kharna hun hi Lunglei DC Pu Ashish Madhaorao More, IAS-in a hmanpui a ni.

Khuallian Lunglei DC Pu Ashish More chuan Industries Department-te thawhrimna, a bik takin State Food Processing Mission hnuaia thawktu officer leh staff-te avangin Lunglei-ah hetiang thil zawngchhang thlak tak mai 'Food Fest' hlawhtling tak a neih a nih avang leh a ngenna ngai pawimawh a ni khata an pawhsei avangin lawmthu a sawi a. Lunglei-a sumdawng leh eisiamtute tan ruahmanna tha tak a ni a, kum dangah te pawh buatsaih zel a nih ngei a beisei thu a sawi bawk a ni.

Joint Director of Industries & Scheme Officer, State Food Processing Mission Pi R.Lalrodingi pawhin 'Food Fest' buatsaih a nih chhan te sawiin, Mizoten mahni siam ngei ei leh in tur kan ngaihsan a, hmasawnna kawng inhawng mek bawhzui a, hamthatna awm thei ang angte pawh department lamah bawhzui nachang hre turin he Fest-a tel zawng zawngte a chah a. Department lam pawhin theihtawp chhuah zel a, anmahni beltute tan department pawh a inhawng reng a ni, a ti.

July ni 2-5, 2-14 chhunga neih he 'Food Fest' ah hian Unit 29 lai an tel a, nitin Fest tlawhtute chu mi 2000 vel niin ni khata sum lakluh chu Rs.1,50,000 vel nia chhut a ni.

Lunglei Food Fest-a lawmman late chu a hnuaia mi ang hi an ni :

1.Special Recognition Award (Innovation) : M/s Hmuni Pickle, Lunglei

2. Best Entrepreneur (Common) : M/s Jemim Chips, Aizawl

3. Most Promising Entrepreneur (Common) : Jabez's Kitchen, Lunglei

4. Best Display (Processing) : KT Bakery, Lunglei

5. Most Hygienic (Servicing) : Plush Cafetaria, Lunglei