Vawiin khan Electric Veng YMA Hall-ah Health Minister Pu Lal Thanzara chuan Electric Veng MHIP buatsaih MHIP Day lawmna a hmanpui.
Pu Lal Thanzara chuan ram leh hnam tana thil tha ti tura din tlawmngai pawl kan nei hi hnamdang te aia Mizote vanneihna bik a ni, a ti. MHIP ten an hmeichhiatpuite tan thahnemngai takin hma an la a, hmeichhe dinhmun chawikanna kawngah theihtawpin ke an pen a, hmeichhiate chunga hleihlenna a thlen pawhin an thlavang hauh turin rang takin an pen chhuak thin te hi a thlamuanthlak hle a ni, a ti a. Sualna chi hrang hrang rukruk, tualthah, damdawi hmansual leh hmeichhiate chunga pawikhawihna rapthlak tak thleng thin te hi tihrem tumin nasa takin sorkar leh tlawmngai pawl ten tan an la a. Heng pawikhawih chingte chanchin chhui chian hian chhungkaw kehchhia atanga chawrchhuak an ni duh hle a, chuvangin kan inchhungkhur venghim turin tan kan lak a ngai a ni, a ti.
Minister chuan khawvel thang chho zelah kan rama hmeichhiate dinhmun pawh a changkang zel a, ram rorel khawl sang berah hmeichhe MLA te pawh kan lo nei ta hi a lawmawm hle a ni, a ti a. Hetianga chak taka hma an sawn mek lai hian hmeichhiate’n an pasal te chungah an in luling thiang lova, Bible ah hmeichhe lu chu mipa a ni tih ziak angin zirnaah leh eizawnna ah an pasalte aia dinhmun sanga ding pawh ni se an zah tur a ni, a ti.
Pu Lal Thanzara chuan ruihhlo dona kawnga MHIP hnathawh fakin, tiranga leh gutkha ei nasat luat avanga thalai tam takin an chhiatpui mek laiin do rem tura beihpui an thlak chuan awmzia a nei hle a ni, a ti a. Tunah hian gutkha zuar leh ei hmuh tur an awm leh nual tak avangin a do hna bansan lo tur leh hma la thar leh turin a sawm a. Hmeichhiate chu awm nem zawk leh chaklo zawka in ngaia a, kutkuangkuah mai lovin, khawtlang, ram leh chhungkaw tan thil ropui tak an ti thei a ni tih hre thar leh turin Minister chuan hmeichhiate a fuih a ni.
MHIP Day lawmna inkhawm hi an President Pi Kamliani’n a kaihruai a, MHIP General Headquarters thuchah chhiarchhuah a nih bakah Asstant Secretary Pi Teresa Vanlalsawmi’n an pawl hmalakna hrang hrangte a tarlang a ni.
