Vawiin khan Lunglei DC Conference Hall-ah Lunglei Bawrhsap Pi K. Lalrinzuali chuan huaisen lawmman ‘JEEVAN RAKSHA PADHAK AWARD 2018’ dawngtu mi pahnih (2) leh zirlai ti tha chawimawina ‘DR AMBEDKAR NATIONAL MERIT AWARD’ dawngtu mi pahnih (2) te hnenah an lawmman dawn a hlan. He hunah hian chawimawina dawngtute, an chhungte leh anmahni tawiawmtute, official-te, MJA, YMA, MZP leh khawtlang hruaitu mi thahnem tak an kalkhawm.

Pi K. Lalrinzuali chuan Lunglei District atanga India ram pum huap chawimawina dawng thei mi pali lai thlanchhuah an ni chu ropui a tih thu sawiin “Chawimawina dawngtute in chhuanawm ka ti takzet a. Vawiina Award kan sem hi mipuite, a bik takin thalaite kawng hrang hranga fuihtu ni thei se ka duh a ni”, a ti. Mahni nunna hlana huaisen taka a thiante chhantu Tv P. Lalvenpuia chhungte hnenah a tawrhpui thu a sawi bawk.

Huaisen lawmman Jeevan Raksha Padak hi sawrkar laipui Ministry of Home Affairs kaltlanga pek chhuah thin niin huaisen chawimawina hi chi thum sem a ni a. Chungte chu Sarvottam Jeevan Raksha Padak Award (Rs 2,00,000 + citation leh medal), Uttam Jeevan Raksha Padak (Rs. 1,50,000 + citation leh medal) leh Jeevan Raksha Padak (Rs. 1,00,000 + citation leh medal). India ram puma Jeevan Raksha Padak 2018 dawng tura thlanchhuah te chu mi 48 niin Mizoram atangin mi 8 an tel a; chungte chu Sarvottam Jeevan Raksha Padak - P. Lalvenpuia (Posthumous), T. Lalrinawma (Posthumous); Uttam Jeevan Raksha Padak -  Lalliansanga, Vanlalduhawma, H. Beiduasa; Jeevan Raksha Padak - Vanlalvenhima Chhangte, Darchungnunga leh Lalthasangzuali te an ni.

Vawiina huaisen lawmman hlan te chu:

1.     P. Lalvenpuia (L) s/o Lalbiakengi, Lungsen Hmar Veng. Tv P. Lalvenpuia (23): December ni 16, 2017 khan YMA Lungsen Venglai Branch Vanapa Section ten Matisora (Belpei/De Lui) ah picnic neiin an kal a. A kalpui Tv R. Lalmuanzuala (Muantea) leh Tv B. Malsawmtluanga te tui tla a chhanchhuahna lamah a nunna a chan a ni. Mahni nunna hlana huaisenna a lantir avangin Sarvottam Jeevan Raksha Padak Award hlan a ni a, a nu Lalbiakengi’n a dawng a ni.

2.     Vanlalvenhima Chhangte 56 Bn BSF S/o Ramthanzauva Chhangte Zotlang Lunglei. April ni 16, 2018 khan Zotlang Lungleiah Pu C. Lalrammawia inah kangmei nasa tak a chhuak a. Pi Malsawmi w/o Pu C. Lalrammawia chu in kang chhunga bedroom pakhatah a tang a. Mipui pung khawm mangang au thawm a hriatin Vanlalvenhima Chhangte hian tubauh leh hmanraw dangten an tukverh leh bang te chhu chhia in in kangah chuan a tlan lut a, Pi Malsawmi chu a chhan chhuak ta a ni. Mahni nunna thapa mi a chhanchhuah avangin Jeevan Raksha Padak hlan a ni. 

Vawiina zirlai ti tha lawmman “Dr AMBEDKAR NATIONAL MERIT AWARD” dawngtute chu:

1.     Vanlalvenpuia S/o Vanlalzawnga, Ramthar, Lunglei. Matric Exam 2017 ah Mizoram pumah 3-na a ni. (Holy Faith School, Lunglei)

2.     Vanlalliani Pachuau D/o L.Lalhmingmawia Pachuau, Bazar Veng, Lunglei. Matric Exam 2017 ah Mizoram pumah 6-na a ni. (Holy Faith School, Lunglei)