Vawiin khan DC Conference Hall, Mamit-ah Dr. Lalrozama, IAS, District Bawrhsap hovin Prime Minister-in khawtin Village Council President-te lehkha a thawna a sawi angin tuihna humhalh, tui renchem leh tui khawlkhawm dan tur ngaihtuaha thutkhawm a ni.

Meeting-ah hian Mamit DC chuan India ram hmun hrang hrangah tui a harsa em em a. Thenkhat phei chu tui in tur takngial pawh tlachham an awm tawh laiin Mizoram-ah chuan tuihnate kan la nei tha a. Kan tuihnate hi humhalh chho zela a theih ang anga ruahtui kan khawlkhawm pawh a tul a ni a ti.

Meeting hian tui humhalh chungchanga Prime Minister lehkhathawn chu Ni 26.6.2019 (Nilaini) khian khawtin VC-te chuan an Village Council huamchhungah Gram Sabha kovin Prime Minister thuchah chu chhiarchhuahna neih nise tih a ni a. Hei bakah hian khawtinte Tuikhur tlan ber hnarah thing a tam thei ang ber phun nise tih a ni a. Mamit khawpui chhung bikah chuan Ni 29.6.2019 (Inrinni) Zing Dar 7:00 hian Sub Hqrs YMA buatsaihin Charkawn atanga GSA Playground thleng Two Wheeler Rally neih tura rel a ni a. He tui humhalh chungchanga Rally neih turah hian Mamit khawpui chhunga Two Wheeler nei zawng zawngte tel vek tura sawm an ni a, mi vannei bikte tan Petrol Lucky Coupon siam a ni dawn bawk a ni.

Meeting-ah hian tui humhalh chungchanga Awareness Campaign atan Zir In hrang hrangah Devotion/ Assembly neih laiin Head Master/Principal-te'n Prime Minister thuchah hi chhiar chhuah nise tih a ni a. Eco Club nei School-te chuan Tuikhur hnara thing phun tura hmalak nise tih a ni bawk.

Meeting hian mitinte chu mahni theihna zawn zawnah tuihna humhalh a, tui renchem tur leh ruahtui khawlkhawmna kawnga nasa zawka tan la turin a ngen bawk a ni.

Vawiin Meeting-ah hian EE, PHED, PD, DRDA, CMO, DLAO, DEO, DIPRO, SDO, PHED, Sub Hqrs YMA, OB, MDVCA, Jt. V/C Mamit bakah MJA President-te an tel a ni.