Vawiin chawhma khan Lunglei Chanmari Sub-Centre-ah Lunglei District Task Force on Immunization Committee Chairman leh Bawrhsap ni bawk Pi K. Lalrinzuali chuan Zenghri danna pek beihpui "Intensified Pulse Polio Immunization" (IPPI) a hawng.

Pi K.Lalrinzuali Deputy Commissioner Lunglei in, he programme hawnna neiin naupang te Vaccine Polio pekna a nei nghal bawk a. Pi K.Lalrinzuali chuan naupang kum 5 chin hnuailam zawng zawngten zenghri danna an dawn theih nan leh Intensified Pulse Polio Immunization a hlawhtlin ngei theih nan mipui an pawimawh tih sawiin tha taka tawiawm turin a sawm a. Zenghri hi natna khirhkhan tak, piansualna hial thlentu anih avangin zenghri danna a hun taka lak hi kan ngai pawimawh em em tur a ni, a ti a. Zenghri natna laka kan him nan leh he natna hian Mizoram ah hmun a khuar loh nan Lunglei District chhung a cheng te theih tawp i chhuah tlang ang u a ti.

Hawnna inkhawm kaihruaitu Dr Thani Pachuau, CMO Lunglei chuan kalkhawmte lawmna thu sawiin Lunglei District Task Force on Immunization hmalakna tlangpui a sawi a. "Intensified Pulse Polio Immunization" (IPPI) hnuaiah naupang kum 5 hnuai lam zawng zawng zenghri danna pek tum niin ni thum (12th-14th March) chhung awh tura ruahman a ni a. Health and Family Welfare Department ten an chhut danin Lunglei District-ah naupang kum 5 hnuailam Target 14075 an awm a, hengte zenghri danna pe tur hian booth 220 District pumah siam a ni a. Hemi piah lamah hian zenghri danna la lo te zawng chhuak turin ‘house to house visit’ neih an tum thu sawiin Lunglei District in 100% achievement nei ngei tura tan an lak thu a sawi.