630/2025-2026

Lunglei, 2025 Ṭomir thla ni 28: India Meteorological Department, Ministry of Earth Sciences-in khaw chin a thlir lawknaah chuan ni 29 May 2025 leh ni 30 May 2025-ah hian Mizoram hmun ṭhenkhatah ruah leh thli (40-50 kmph) thawh theihna hmun awmin a tar lang a. Hemi chungchangah hian Lunglei District Disaster Management Authority (DDMA) Chairman Pi Navneet Mann chuan Lunglei District huam chhunga Local/Village Disaster Management Committee-te mahni veng/khua ṭheuhah a ṭul anga hma lo la turin leh a hnuaia inkaihhruaina tar lante hi lo puangzar turin ngenna leh hriattirna a chhuah.

Thli leh ruah thawh hmaa tih tur leh tih loh turte:

1.Mahni in leh lo, office building leh hna thawhna hmunte'n thli leh ruah a dawl theih nan a ṭul anga thawm ṭhat ngai laite thawm ṭhat tur a ni.

2.Thing leh mau, thliin a len thluk mai theih, electric wire delh mai theite chu kih/a zar thlak tur a ni.

3.Thlipui leh ruah vanga current neih loh theih a nih avangin mobile phone leh electrical appliances charge theih ang angte chu charge full sa vek tur a ni.

4.Tuihawk luan kawrte then fai tur a ni.

5.Lei laih lai neite tan, lei min a thlen loh nan hna thawh zawhah uluk taka khuh hul tur a ni.

6.Tukverh leh kawngkhar nghet taka khar tur a ni.

7.Mahni ram chhung lei min hlauhawm awmte a ram neitute'n an khuh hul tur a ni.

8.In chung rangva thli lak mai theihte thawm ṭhat tur a ni.

Thli leh ruah thawh laia tih tur leh tih loh turte:

1.Electrical appliances zawng zawng OFF vek tur a ni.

2.Lirthei motor reng reng garage-ah him taka park tur a ni.

3.Mahni in leh lo chhuahsan tur a ni lo va, in chhungah tawm him tur a ni a, chi-ai tur a ni lo.

4.Tuihawk luan kawr bul hnaiah kal loh tur a ni.

5.Thli leh ruah thawh laiin luiah leh lui hnaihah tu mah kal loh tur a ni.

Khuarel chhiatna a lo thlenin mahni bialtu Zonal Officer-te hnenah chhiatna thlen thu hriattir tur a ni a, eng emaw vanga biak tlang theih loh an nih chuan Link Zonal Officer emaw, a hnuaia number tar lanahte hian report tur a ni e:

DEOC Control Room Number - 0372-2323635
DEOC Control Room Hotline Number - 1077