723/2026-2027

Lunglei, 2026 Ṭomir thla ni 26: Special Intensive Revision (SIR) of Electoral Rolls, 2026 kalpui mekah May ni 22 leh May ni 26, 2026 inkar chhung khan Lunglei District chhunga Assembly Constituency hrang hranga Booth Level Officer (BLO)-te tan hlawhtling takin training buatsaih fel a ni.

Training hi Lunglei District chhunga Assembly Constituency paruk – 30-Lunglei North, 31-Lunglei East, 32-Lunglei West, 33-Lunglei South, 34-Thorang leh 35-West Tuipui te tan Lunglei DC Conference Hall-ah leh SDO (Civil) Conference Hall, Tlabungah te a hrang zelin hun ruk buatsaih a ni a. May ni 22 chawhma leh chawhnu, May ni 25 chawhma leh chawhnu leh May ni 26 chawhmaah te training hi buatsaih niin, Election Officer Pi Lalhruaitluangi, DLAO Pu Beitlotha Nohro, BDO Lungsen Pu Lalhruailiana Zote leh SDO (Civil) Tlabung Pu Moses Lalfakawma Tlau te'n training hi an pe a ni.

Training-ah hian BLO-te chu SIR kalpui tur chungchanga thil pawimawh hrang hrang – in tin tlawh chhuaka endikna kalpui dan tur te, inchhiarna (Enumeration Form) dah khah dan tur te, vote nei thei hriat theihna tur te, voter-te chanchin dik taka ziah dan tur te leh Electoral Roll dik leh felfai tak vawn dan tur te zirtir an ni a. SIR-a hman tur Enumeration Form bakah, BLO Kit (ip, tuithawl leh nihliap awmna) te sem nghal a ni bawk.

Lunglei District Election Officer Pi Navneet Mann chuan India khua leh tui kum 18 tling chinte kim taka electoral roll-a ziah luh an nih theih nan BLO-te chuan mawhphurhna lian tak an nei tih sawiin, SIR 2026 hlawhtling taka kalpui a nih theih nan theih tawp chhuah turin a chah.