2612/2026-2027

Lunglei, 2026 Khuangchawi Thla ni 9: October ni 9–23, 2026 chhunga khelh tur Lunglei Officers' Club (LOC) Sports 2026 chu vawiin khan Lunglei Government College (LGC) Auditorium-ah a hawnna hun hman a ni a. Lunglei District Bawrhsap & LOC Patron Pi Navneet Mann chu Khuallian niin, LGC Principal Pu Lalrammuana Chawngthu chu Khual Zahawm a ni.

Bawrhsap Pi Navneet Mann chuan LOC Sports 2026 chu member-te zinga inhmelhriatna leh thawh hona ṭha siamtu a nih a beisei thu sawiin, member-te chu hlawhtling taka Sports hmang turin duhsakna a hlan a. LOC-in zirlaite tana career awareness an buatsaih ṭhin leh mi harsate ṭanpui nana an luang chhuak ṭhin chu lawmawm a tih thu sawiin, LOC member-te chu hawihhawmna leh rinawmna nen hna thawk zel tur te, department hrang hrang karah thawh hona ṭha tak nei a, District leh mipuite tan ṭhahnem ngai taka thawk zel tur te'n a chah a. LOC Sports 2026 chu a hawng nghal.

Khual Zahawm Pu Lalrammuana Chawngthu pawhin LOC Sports 2026 tluang taka bul ṭan theih a ni chu lawmawm a tih thu sawiin, member-te inkara thawh hona leh inunauna ṭha siamtu a nih a beisei thu a sawi.

LOC Sports 2026 hawnnaah hian Lunglei District Superintendent of Police Pu Shivam Siddharth bakah, LOC office bearer leh member eng emaw zat an tel a. LOC Secretary, Lunglei DIPRO Pu C. Lalhruaitluanga'n hun kaihruaiin, President, 2nd Bn MAP Commandant Pu Francis Lalnuntluanga Ralte chuan inlawmna thu a sawi a. Assistant Secretary, Lunglei DTO Pu Beitlotha Nohro chuan sports kalpui dan tur sawi fiahin, thutiam lak a kaihruai a. Intihsiakna hrang hrang khelh zui nghal a ni.

LOC Sports 2026-ah hian LOC member-te chu team pali – Blue, Green, Red leh White-ah inṭhenin, item hrang hrang 11 – badminton, futsal, air rifle shooting, carrom, Chinese checkers, draught, dawl chuh, kawi kah, dart throw, spoon-marble race leh musical chair hmang te'n an inel dawn a. Infiamna leh intihhlimna hrang hrangte hi October ni 9, ni 16 leh ni 23-ah te buatsaih tura ruahman a ni.