3142/2024-2025

2024 Sahmulphah thla ni 22: Lunglei District Deputy Commissioner (DC/Bawrhsap) thar Pi Navneet Mann, IAS chuan vawiin November ni 22, 2024 (Zirtawpni) chawhma dar 10:30 khan Pu R. Lalṭhazuala, MCS hnen aṭanga mawhphurhna lain, Lunglei District Bawrhsap hna a zawm.

Bawrhsap pisaa Bawrhsap mawhphurhna inhlan chhawnna hunah hian Pi Navneet Mann pasal, Pu Shivam Siddharth, IPS leh Lunglei DC office-a officer-te leh DIPRO te an tel a. Bawrhsap kal chhuak Pu R. Lalṭhazuala chuan Pi Navneet Mann kuta mawhphurhna a hlan rualin duhsakna hlanin, Lunglei chhuahsanin Aizawl a pan nghal a. Land Revenue & Settlement Department-ah Director-in a awm dawn a ni.  

Pi Navneet Mann hi Amritsar, Punjab chhuak niin, New Delhi-ah an inbengbel a. Mount Carmel School, Anand Niketan, New Delhi-ah sikul kal ṭhinin, Indira Gandhi Delhi Technical University for Women, Delhi aṭangin Bachelor of Technology (Computer Science & Engineering) a zo va. Kum 2020 batch AGMUT cadre Indian Administration Service (IAS) officer niin, Jammu & Kashmir sawrkar hnuaiah Assistant Commissioner hna leh Delhi sawrkar hnuaiah Sub-Deputy Magistrate, Special Secretary (Home Department) leh Deputy Commissioner, Municipal Corporation of Delhi hna te a lo thawk tawh a. Mizoram sawrkar hnuaia thawk tura rawn sawn a nih angin October ni 28, 2024 khan a rawn zawm a, Mizoram sawrkar hnuaia a mawhphurhna hmasa ber atan Lunglei District Bawrhsap tur hian ruat a ni.

Lunglei District Bawrhsap thar Pi Navneet Mann pasal Pu Shivam Siddharth hi Indian Police Service (AGMUT 2020) officer niin, Siaha District-ah Superintendent of Police-in a awm dawn bawk a ni.

Lunglei District Bawrhsap thar chuan District mipuite chibai bukin, District hmasawn nan mipuite, tlawmngai pawl, kohhran, chanchinbu mite leh sawrkar department hrang hrangte ṭawiawmna, thawhpuina leh finchhuahna a ngen a ni.

Attachment

  • Loading attachment...