3256/2024-2025

2024 Sahmulphah thla ni 28: Vawiin khan Lunglei District Deputy Commissioner Pi Navneet Mann kaihhruaiin Lunglei DC Conference Hall-ah Lunglei District chhunga department hrang hrangte dinhmun, hna thawh leh hma lakna inhrilh hriat nana inkawm hona buatsaih a ni.

Lunglei Bawrhsap Pi Navneet Mann chuan District enkawlna kawngah leh District hmasawn nan sawrkar department hrang hrangte nena thawh hona ṭha tak neih a pawimawh tih sawiin, department-te chu thawh hopuiah a sawm a. Department hrang hrangte hna thawh leh dinhmun hriat chian a, hma lakna tur leh ṭan lak ngaihna te hriat theih nan meeting chu buatsaih a nih thu sawiin, department-te chu mipui rawng an bawlna kawngah mamawh leh harsatna an neihte tlang taka a hnena thlen ṭhin turin a chah a. Department-te hma lakna leh harsatna inhriatpui tawnna aṭangin thawh hona ṭha zawk leh hmasawnna duhawm zawk a awm theih a beisei thu a sawi.

He hunah hian Additional Deputy Commissioner pahnih - Pu James Miahlung leh Pi Rochuangkimi Khenglawt te'n Bawrhsap hi an ṭawiawm a. Department hrang hrang hotute'n an department dinhmun leh hma laknate bakah, hmachhawp an neih leh harsatna an neihte an tar lang a. Department-te hma lakna thuam chak dan tur te, harsatna hrang hrang an neihte chin fel dan tur leh District hmasawn nana ṭha zawka hna thawh dan tur rawtnate sawi ho a ni.