3255/2024-2025

2024 Sahmulphah thla ni 28: Vawiin khan village council (VC) leh local council (LC) inthlanpui, 2025 atana hman tur VC/LC electoral roll en nawn (revision) kalpui mek chungchangah Lunglei DC Conference Hall-ah Lunglei Municipal Council (LMC) huam chhunga LC 24-a local level officer (LLO)-te tan thil pawimawh hrang hrang inzirtirna training buatsaih a ni.

He hun hi Lunglei District Election Officer (DEO) Pi Navneet Mann chuan hmanpuiin, Election Commission of India (ECI) hnuaia electoral roll en nawn (special summary revision) leh VC/LC roll revision chu a ruala kalpui mek a nih avangin BLO/VLO/LLO te chu an buaiin an hah hle dawn tih a hriat thiampui thu a sawi a. Electoral roll en nawn chu kum tin kalpui a nih rualin, inthlan dawn kumah chuan fimkhur leh uluk a ṭul zual tih sawiin, VC/LC roll revision pawh inthlanpuia hman tur a nih tawh avangin dik, felfai leh thianghlim taka buatsaih a nih theih nan LLO-te chu theih tawp chhuah turin a chah a. Inthlan zalen, felfai leh thianghlim a awm theih nan roll felfai a awm a ṭul tih sawiin, revision kalpui mek chu fimkhur leh uluk lehzuala kalpui turin a chah a ni.

He hun hi Election Officer Pi R. Lalrinzuali'n kaihruaiin, kum thara VC/LC inthlanpui buatsaih tur atana inpuahchahna, roll revision kalpui mekah tihsual palh a awm loh nan leh roll dik leh felfai a awm theih nan VLO/LLO te tana training chu ruahman a nih thu a sawi a. Vawiinah local council huam chhunga LLO-te tan training buatsaih niin, naktukah VC area-a VLO (village level officer)-te tan training buatsaih leh tura ruahman a nih thu a sawi.

State Level Master Trainer Pu Lalremruata Sailo, Lunglei DCSO chuan training hi pein, LC electoral roll en nawn kalpui tura LLO-te tih tur leh hriat tur pawimawh hrang hrang a sawi fiah a. Hming thun thar, hming paih, siam ṭhat leh awmna hmun sawn nana form hman tur hrang hrang te, a hman dan tur leh roll-a chuang thei chin te leh roll revision kalpui dan tur te zir ho niin, zawhna leh chhanna leh sawi hona hun hman a ni bawk.

He training-ah hian form hman tur chi thum - Form 3 (kum tling thar thunna bakah, VC constituency hrana awmte'n an awmna hluia mi paih a, tuna an awmna constituency-a inziah luh an dilna), Form 4 (mitthi bakah non-tribal paih tur an nih anga paih dilna) leh Form 5 (siam ṭhat ngai siam ṭhat dilna) te hman dan tur a taka zir ho a ni a. Tun ṭuma VC/LC roll siam thar turah hian India khua leh tui, scheduled tribe, January ni 1, 2025-a kum 18 pum hlum tur chin, constituency chhunga ni 180 tal lo khawsa nghet tawhte chauh thun theih a nih thu tar lan niin, ni 26.01.1950 leh a hma lama Mizorama cheng Gorkhali-te leh an thlah (direct descendant)-te erawh chu VC/LC roll-ah hian an tel thei tih tar lan a ni.

Vawiin training-ah hian Lunglei District chhunga local council awmna khua/veng 24-a local level officer 50 an tel a. Naktuk khian Lunglei District chhunga village council awmna khua/veng 88-a village level officer 117 te tan training buatsaih ve leh a ni ang.