3559/2024-2025

2024 Pawltlak thla ni 16: Vawiin khan Lunglei District Bawrhsap Pi Navneet Mann chuan Serkawna Baptist Church of Mizoram (BCM) hmunpui te, BCM hnuaia hnuchham enkawlna in, Baptist Church Orphanage (BCO) leh Baptist Child Resources Centre (BCRC) bakah, ruihhlo ngai leh rahbi tleute enkawlna, MBKHP Chhawmdawlna In te, kum tling lo dan bawhchhiate enkawlna, Observation Home leh Special Home te a tlawh a. Home hrang hrangte dinhmun enfiahin, Krismas thilpek a hlan bawk.

Bawrhsap Pi Navneet Mann hi Additional Deputy Commissioner Pi Rochuangkimi Khenglawt, DIPRO Pu C. Lalhruaitluanga, DPO(WCD) Pu C. Lalnunfela leh DCPO Pi Lalrinkimi Hmar te'n an ṭawiawm a. BCM hmunpui an tlawhnaah BCM General Secretary Rev. Dr R. Lalbiakliana hovin thawktute'n lo dawngsawngin, BCM Archives-a Sap Upa leh Pu Buanga leh Zosapte sulhnu hrang hrang leh kohhran thil pawimawh te an lo enpui a. BCO, BCRC, Chhawmdawlna In, Observation Home leh Special Home an tlawhnaah hian thawktute'n lo dawngsawngin, an dinhmun leh hma lakna te an lo hrilhfiah bakah, an harsatna leh mamawh te an lo thlen a. Hmasawnna atana thil pawimawh hrang hrang sawi hovin, Bawrhsap hian he'ng home-te hnenah hian Krismas thilpek a hlan nghal bawk.

BCO-ah hian nau hnuchham leh naupang enkawltu mumal nei lo enkawl lai 28 awmin, BCRC-ah fa atana lak theih tur naupang enkawl lai 1 a awm bawk a. Chhawmdawlna Inah hian ruihhlo ngai leh rahbi tleu chhawmdawl ngai enkawl lai mipa 66 leh hmeichhia 17, an vaiin mi 83 an awm mek a. Kum tling lo ni chunga dan bawhchhiat avanga JJ Act hnuaia an nun siam ṭhatna tura enkawl lai Observation Home-ah mipa naupang 2 leh Special Home-ah mipa naupang 13 an awm mek bawk.

Attachment

  • Loading attachment...