606/2025-2026

Lunglei, 2025 Ṭomir thla ni 14: Vawiin khan Lunglei District Deputy Commissioner Office hma laknaa mipuite'n sawrkar hma lakna hrang hrangte an chhawr ṭangkai theih nan an khuaa kal chilha service hrang hrang chhawp chhuahsakna, "I Kawtkaiah Sawrkar" (Prashasan Gaon Ki Ore) hun chu Bualte leh a chhehvel khaw mipuite tan Bualte Community Hall-ah buatsaih a ni.

Bualtea "I Kawtkaiah Sawrkar" hun buatsaih hi Lunglei District Civil Supply Officer, Lunglei BDO mawhphurhna latu Pu Lalremruata Sailo chuan a kaihruai a. Lunglei Sub-Deputy Commissioner Pi Lalrampari chuan I Kawtkaiah Sawrkar kalpui dan report pein, Bualte Village Council President Pu Malsawmkima chuan Lunglei DC hma laknaa Bualte mipuite'n an kawtkaiah awlsam taka sawrkar department hrang hrang dawr theihna leh an harsatna chin felna remchang an neih theih avanga an lawm thu a sawi bawk.

He hunah hian office hrang hrang - Deputy Commissioner, Aadhaar & Election Branch, Health & Family Welfare, AH & Veterinary, Agriculture, Horticulture, Education, Women & Child Development (ICDS), Rural Development Block Development Office, FCS&CA (Supply), Power & Electricity Department, PHE Department, District Transport Office, Land Revenue & Settlement Department leh Mizoram Rural Bank te'n stall hawngin, awlsam zawka mipuite dawr theih turin an inpho chhuak a. Electoral roll enfiah/inziah luh, Aadhaar siam ṭhat/siam thar, income/tribal/residential certificate dil, ration card siam ṭhat, bank account hawn thar, hriselna dinhmun endik & ABHA Card siam, ran entir leh hri danna pek, thei leh thlai chi sem, sawrkar scheme hrang hrang inhrilhfiah leh inziah luh leh mipuiin harsatna an thlenna hun te buatsaih a ni.

I Kawtkaiah Sawrkar programme hi January ni 14, 2025 khan bul ṭan a ni a. Bualte hma hian Haulawng, Ralvawng, Bunghmun, Tlabung leh Lungsenah te lo buatsaih tawh a ni.