1889/2026-2027

Lunglei, 2026 Thlazing ni 20: Lunglei District chhunga VC02008–Bunghmun Village Council (VC)-a reserve seat ruak pakhat leh Lunglei Municipal Council (LMC) huam chhunga I/2–Zotlang Local Council (LC)-a general seat ruak pakhat hnawh khat tura by-election buatsaihah vawiin khan zing dar 7 aṭanga tlai dar 5 thlengin boruak muanawm tak hnuaiah vote thlak a ni a. Inthlannaa vote tlate hi vote thlak zawh hun tiam ral hnuah tih tur ṭulte tihfel a nih hnuah polling station hmunah chhiar fel nghal a ni.

Bunghmun VC-a vote awm zat 794 (mipa 384 leh hmeichhia 410) aṭangin vote 576 (mipa 303 leh hmeichhia 273) tlain, vote awm zawng zawng aṭanga vote tla zat hi 72.54% a ni a. Zotlang LC-a vote 1,935 (mipa 913 leh hmeichhia 1,022) awmah vote 1,081 (mipa 510 leh hmeichhia 571) tlain, vote tla zawng zawng hi 55.87% a ni.

Bunghmun VC-ah candidate pahnih awmin, vote 314 hmutu Zoram People's Movement (ZPM) candidate B. Lallawmkimi chu tlinga puan a ni a; a khingpui Mizo National Front (MNF) candidate Cecilia Saidengpuii Sailo chuan vote 260 hmuin, vote thi 2 a awm. Zotlang LC-ah candidate pahnih bawk awmin, vote 537 hmutu ZPM candidate R. Lalrampana chu tlinga puan a ni a; a khingpui Indian National Congress (INC) candidate R. Lalliantluanga'n vote 535 hmu thungin, vote thi 9 a awm bawk.