Vawiin khan Lunglei DC Conference Hall-ah Lunglei District Consultative Committee (DCC)/ District Level Review Committee (DLRC)/District Level Security Committee (DLSC) chu an Chairman Lunglei DC Pu V. Lalsangliana, IAS kaihhruaiin an thukhawm. Quarter ending September, 2019 chhunga District chhunga Bank hrang hrang te hmalakna an thlirho. Meeting-ah hian Lunglei District Lead Bank Manager Pi Lalhlupuii, RBI atangin Pu Dhruba Jyoti, NABARD atangin Pu Evan T Munsong leh Bank hrang hrang Manager-te leh sawrkar line Department hotute an tel a ni.

DLCC Chairman Lunglei DC Pu V. Lalsangliana chuan Bank-te chu ram hmasawnna hnathawktu pawimawh tak an nih thu sawiin Bank manager kalkhawmte chu an Bank hmalakna apiangah mipui hmasawnna leh an hamthatna dah pawimawh hmasa ber thin turin a chah a. Kan ram ti hmasawn zel turin Bank leh Sawrkar Department te inkarah thawhhona tha tak a awm a pawimawh takzet a ni tiin kalkhawmte chu Sawrkar laipui leh state Sawrkar Flargship Program-te ti hlawhtling tura theihtawp chhuah chhunzawm zel turin a chah bawk. 

DLCC Chairman hian NABARD buatsaih Lunglei District Potential Linked Credit Plan (PLP) 2020-21 a tlangzarh nghal a ni. He Potential Linked Credit Plan (PLP) hmang hian Lunglei District-a Bank ten 2020-21 chhunga an loan pek chhuah dan tur ruahmanna theuh Annual Credit Plan  (ACP) an siam dawn a ni.

He meeting a pharh, September 2019 quarter tawp a Lunglei District chhunga bank hrang hrang te hmalakna tlangpui chu hetiang hi a ni. Lunglei District pumpui ah Deposit Rs. 78,294.39 lakhs niin loan pek chhuah zat chu Rs.38,432.14 lakhs niin Credit Deposit Ratio (CD Ratio – Bank in Deposit a dawn atanga loan a pekchhuah zat) chu 49.09% a nih thu tarlan a ni. Priority Sector Advance (Agriculture, Micro Enterprise, Loan to weaker section) chu 52.90% niin hei hi a tha thawkhat viau a ni. September 2019 quarter chhungin mi 235 hnenah Agriculture loan Rs. 324.75 lakhs total pek chhuah tawh a ni. Tin he quarter chhung vek hian sumdawng hrang hrang - Micro, Small and Medium Enterprises (Manufacturing leh Services) mi 137 te hnenah loan Rs. 348.51 lakhs pek chhuah an ni. Sawrkar laipui hmalakna khawpuia chengte insak tanpuina Pradhan Mantri Awas Yojana PMAY hnuaia September 2019 quarter ah khan chhungkaw 13 hnenah loan pek chhuah an ni bawk. Tin, he quarter chhung vek hian National Urban Livelihood Mission (NULM) hnuaia Self Employment Programme hnuaiah mi 9 hnenah loan pek chhuah niin Self Help Group (SHG) 17 hnenah loan Rs. 30.00 lakhs pek chhuah an ni bawk.  

Committee chuan Line Department leh Bank-te thawhhona tha tak nei chhunzawm zel se tiin Banking chungchang mipuite zirtirna Financial Literacy Campaign te pawh tun aia uar zawka neh ni se tih a rel a. Bank Security chungchang ngaituah hona ah Bank hrang hrang ten Bank Security an neih bakah CCTV, Fire Extinguisher, Alarm System leh Police patrol log book te dahin an enkawl that thu tarlan a ni a. Lunglei Police te nen hemi kawnga thawhhona tha tak an neih thu tarlan a ni.