114/2024-2025

LUNGLEI; the 9^th April, 2024: Vawiin chawhma dar 11:00  khan DC conference Hall-ah District Disaster Management Authority, Lunglei district  ten meeting an nei. Vawiin meeting-ah hian kan hmalawka Furpui a lo thlen hun a, Furpui in khuarel chhiatna leh harsatna hrang hrang a thlen theih te laka lo inven dan tur leh a lo thlen palh thulha harsatna hrang hrang awm thei te hmachhawn dan tur leh sutkian dan tur te huam zau taka rel a ni. Meeting hi District bawrhsap leh DDMA, Lunglei District Chairman ni bawk Pi Ramdinliani’n a kaihruai a ni.

Vawiin meeting-ah hian DDMA hmalak mek leh hmalak tawhna te bakah hmachhawp te tarlan niin, District Disaster Management Plan, 2023  update a  line department hnena semchhuah vek tawh a nih bakah SOP te chu tha taka zira response plan te pawh duang theuh tura hrilhriat an ni bawk. Lunglei District hi Zone 8 a then a ni a, chu chu Zonal Officer pakhat theuh vin an vil mek a ni.

Furpui a lo thlen huna khuarel chhiatnaa lo thlen thulha rang taka hma la nghal tu tur atan Quick Response Team din a ni tawh a, District Emergency Operation Centre pawh 24 x 7 activate a ni ang. Tunah hian District Administration in Silpaulin (a lian chi)-186 leh a te chi-227 a kawl mek. District Advisory Committee on Institutional Safety din niin, Private leh Gov’t Hospital in damlo a dawl zawh dan te zirchian tawh a ni bawk.

Sub-Divisional Disaster Management Committee, Tlabung din tawh niin, he committee hian Fur laia tui lian laka tawm himna tur  building leh Temporary  shelter pawh  a ruahman tawh bawk. Lunglei district hmun danga tui lian/lei min/harsatna dang avanga mahni chenna in chhuahsan te awm lailawkna tur Community Hall leh school te identified tawh a ni bawk. DM& R atangin weather Forecast hi nitin mipui hnenah Social media kaltlanga puanzar thin a ni. Kar hmasa a thli leh Rial in a tihchhiat chenna In, school, thlai etc te khaw 20 atanga report dawn te chu  Incident Commander /Zonal Officer ten a hmunah kal chilhin a tam zawk hi an enfiah tawh a, hmalak zel dan tur ngaihtuah mek a ni.

District bawrhsap leh Chairman District Disaster Management Authority, Lunglei district ni bawk Pi Ramdinliani chuan Ruah leh thlipui vanga chhiatna hrang hrang a lo thlen thulh a, Lunglei District mipui ten an HRIAT TUR pawimawh thuchhuah hetiang hian a lo siam tawh bawk a ni.

1. Village Disaster Management Committee (VDMC) te inralring renga awm tur a ni. Kan khaw huamchhungah ruah leh thlipui avanga chhiatna thleng a awm leh awm loh thlithlai reng tur a ni.

2. Chhiatna engpawh a thlenin mahni bialtu Zonal Officer te hriattir nghal vat tur a ni a, an thu ngaichangin a tul anga hma lak zui tur a ni. Lunglei town area-a chhiatna thleng chu a thlen ni (date of incident) atanga kar khat chhung ngeiin Deputy Commissioner office-ah thalak fiah tak nen thehluh tur a ni. Lunglei town area pawn lam chu a thlen atanga thlakhat ral hma ngeiin thalak nen thehluh tur a ni. Chhiatna thlen atanga thla ruk hnu lama report thehluh te a awm fo thina, hun a liam tam tawh chuan verification mumal tak tih a harsa tawh thina, a rinhlelhawm bawk thin a ni.

3. Rikrum thilah ziaka report thehluh remchanloh chang a tam a, chutiang a nih pawhin chhiatna thlen hun, ni leh darkar chhinchhiah nghala, thalak fiah tak neih tum tur a ni. Remchang hmasa berah ziaka thalak nen report thehluh tur a ni.

4. Hmanhmawh thila debris clearance (leimin paih fai) ngai a awm anih chuan bialtu Zonal Officer hriatpuina-in hna thawh tur a ni. Chumi atan bik chuan report na tur proforma duan a ni a, he form (enclosed) hmang lova sanction dilna chu pawm a ni lo ang. Tin, Zonal Officer te hriatpuina ni lova mahni thua leimin thenfai hna leh hna dang lo thawh a, a hnua bill submit leh te chu pawm an ni lo ang.

5. Mimal atanga harsatna emaw chhiatna thleng report ah reng reng Village Council/Local Council te hriatpuina felfai tak a tel ngei tur a ni.

6. HDPE polytarpaulin (Silpaulin ti-a hriat lar) hi leimin tur venna atan tih loh ah chuan pekchhuah a ni lovang. Dilna ah chuan mamawh chhan chiang taka ziakin, thalak fiah tha tak leh Village Council/Local Council hriatpuina thil tel tur a ni. Silpaulin dilna hi Lunglei Municipal Council area huam chhunga awmte chuan Deputy Commissioner office-ah thehluh tur a ni a, LMC pawna chengte chuan an bialtu Block Development Officer (BDO) te hnenah dil tur a ni. Verification tih hnu ah silpaulin chu pek chhuah chauh a ni ang.

7. Chhanchhuahna hnathawh ngai a awmin (leimin avanga in chim leh adangte) bialtu Zonal Officer emaw District Emergency Operation Centre (DEOC, toll-free number 1077), Police (Toll-free number 100) leh Health Department (Ambulance service toll-free number 102) ah te a rang thei ang bera hriattir tur a ni.