Vawiin khan Lunglei District Disaster Management Authority chu an Chairman Dr Ankita Chakravarty, IAS kaihhruaiin a office chamber-ah an thukhawm.
Meeting-ah hian Directorate of Geology and Mineral Resources mithiamten Lunglei District hmun hrang hranga lei khi leh leimin na hmun an zirchianna report ‘Geological Investigation Report’ chu chipchiar taka zirho a ni a. He Report-ah hian Zotlang, Lunglei Tourist Lodge bula lei khi, Bunghmun khaw lei khi leh lei kak, Mualthuam North leimin leh Hnathial Kanan Veng NH 54 leimin te zirchian niin heng khuarel chhiatna lo thlen chhan te leh chhiatna nasa zawk a thlen lohna tura hmalak dan tur ziah lan a ni a. Meeting-ah hian heng hmuna tuiluankawr/side drain siam, PHE Pipe phumna hmun sawn, retaining wall siam, kawng dunga lirthei tlan dan tur mumal taka ruahman kawngah te hmalak nghal dan tur sawiho a ni a. District chhunga chhiatna chi hrang hrang thleng thei laka invenna tur thil tih tul nia an hriatte an sawiho bawk.
Dr Ankita Chakravarty chuan he hmalaknaa concern Department-te chu Geology and Mineral Resources mithiamte rawn chunga uluk tak leh a rang thei ang bera hma la nghal turin a chah a. District Disaster Management Authority chu chhiatrupna a thlen thulha buaipuitu leh inrin lawkna atana hmalatu anih angin inpuahchahna leh inbuatsaihna tha tak kan neih reng a tul a ni, a ti a. Hemi kawngah mipui tam zawk zirtirna pe turin ruahmanna siam mek a nih thu sawiin Lunglei DC chuan Directorate of Geology and Mineral Resources nena tangkawpin Sensitization and Awareness Campaign buatsaih thuai a nih tur thu a tarlang bawk.
