Kumin India Independence Day champha phak vawi 66-na lawmna chu Lunglei-ah Thuamluaia Mualah hman a ni ang a, Mizoram Sports & Youth Services Minister leh Lunglei South Bialtu ni bawk Pu Zodintluanga chu Khuallian tura beisei a ni.
Independence Day 2013 hmandan tur chu hetiang hi a ni : Zing dar 10:00-ah Khuallian-in hnam puanzar a pawtparh ang a, dar 10:05-ah Inspection Parade, 10:10-ah March Past, 10:35-ah Khuallian thusawi, 11:00-ah Mass Drill by BHSS Jr. Section, 11:10-ah Prize Distribution neiin lawmna inkhawm hi khar a ni ang. Hemi hnu chhun dar 12:00-ah DC’s Bunglow-ah sawmbikte tan thingpui ruai ‘At Home’ neih zui a ni ang.
Independence Day 2013 pual hian Lunglei Photographers’ Assn. chuan 15th - 17th. Aug. 2013 chhung hian Art & Culture Auditorium, Venglai-ah a tum khat nan ‘Photo Exhibition’ an buatsaih dawn a, he exhibition hi dar 11:30-ah Pu Zodintluanga’n a hawng ang. Photo Exhibition-ah hian thlalak chi hrang hrang za chuang pho chhuah a ni dawn a, a tlawhtu ten thlalak mawi an tih ber thlanna (Viewer’s Choice) siam a ni dawn bawk. Thlalak te hi uluk takin 12”x18” a print a ni a, pakhat hi Rs. 1000/- zelin lei theih a ni ang.
Independence Day pual hian zing karah sakhaw hrang hrang te pawh anmahni remchan danin mahni biakbuk theuhah ram chhungah remna leh muanna a awm theih nan leh India khua leh tui zawng zawng te inpumkhat a, hnam tin te lungmuang taka kan chenho za theihna tur atan tawngtaina hlan tura ngen leh beisei an ni.
