Pachhung University College Library building thar, cheng nuai 280 senga sak chu vawiin khan Mizoram University Vice Chancellor, Prof. R.Lalthantluanga chuan a hawng.

Library building thar hi UGC 11th Plan atanga sum hmuh hmangin National Building Construction Company (NBCC) chuan an sa a, kum 2010 July thla khan sa tanin February 2013 khan an sa zo a, square metre 936.60 a zau niin basement nen chhawng thum a ni. He building tharah hian kangmei laka invenna, fire alarm leh smoke detector te vuah a nih bakah car parking hmun zau tak pawh siam a ni.

Library-ah hian thawktu 11 awmin lehkhabu 47,930 a awm mek a, science stream-ah section 11, Arts stream-ah section 16 leh commerce stream-ah section 1 a awm a. Library building thara dah tur lehkhabu lei nan cheng nuai 16 sen niin furniture lei nan cheng nuai 46.08 zet sen a ni bawk.

Library building thar hawnna-ah hian Vice Chancellor, Prof. R.Lalthantluanga chuan, tunlai khawvelah internet hmangin mi tam takin an thil duh te an zawng a, library an tlawh khat tawh thu sawiin, 'Internet-ah chuan a kimchang tawk lo fova, lehkhabu-ah erawh chuan kimchang takin kan thil duh kan hre thei a ni,' a ti a. Library thar chu a tam thei ang ber hmang tangkai turin zirlaite leh zirtirtute a chah bawk a ni.

Pachhunga University College hi kum 1958 khan Night College-a bul tan a ni a, library pawh te tak te a bul tan a ni. Kum 1960 khan library building hran neiin lehkhabu leh magazine pawh tam tak lakkhawm a ni a, India Hmarchhaka Library changtlung ber a ni nghe nge. Amaherawhchu, kum 1981 khan he library hi a kang a, lehkhabu 25000 chuang chu a kang chhe vek a ni. Kum 1984 khan library hi din thar leh a ni a, library building tha tak sak niin lehkhabu pawh tam tham tak lakkhawm leh a ni.

Tunlai thiamna thang zel avang leh lehkhabu a lo tam tak zel avangin, library building pawh chuan a dawl zo tawh lova, July 2010 khan building hlui chu thiah niin a thar sak a ni ta a a ni.

Libary building thar hawnna inkhawm hi College Principal, Dr.Tawnenga chuan a kaihruai a, Mizoram University Vice Chancellor, Prof. R.Lalthantluanga bakah hian Registrar, C.Lalthankima bakah college zirtirtute leh zirlai thahnem tak an tel a ni.