2752/2024-2025

2024 Khuangchawi thla ni 29: District Jail Visitor Board Lunglei chuan vawiin khan District Jail Lunglei an tlawh a. Hemi rual hian Lunglei Disrict Legal Services Authority (DLSA) huaihawtin tan ina tangte tana rilru hriselna chungchang (mental health) leh India rama dan thar (criminal laws) pathum zir hona buatsaih a ni.

He huna Khuallian, Lunglei South bialtu MLA Pu Lalramliana Papuia chuan Distict Jail Lunglei hmasawnna turin sawrkarin SASCI sum aṭangin ruahmanna a siam mek tih a sawi a. Sawrkarin jail inenkawlna dan thar a ruahman mek tih tar langin, chumi dan thar hnuaiah chuan jail aṭanga zirna sang zawk chhunzawm leh talent hrang hrang peipun theih dan tur te, jail tang mek tan chhuah lailawk theihna dan te a la awm dawn a ni, a ti a. Jail tangte chu tan in an chhuahsan huna an awm dan tur lo inruahman lawk tura chahin, an tan hun chhung chu hma lam hun eng zawk nei thei tura inbuatsaih nan hmang turin a chah a. Taksa lama hrisel turin rilru hrisel leh ngaihtuahna dik put a ngai tih sawiin, rilru hrisel lo chuan buaina, harsatna leh pawi khawihna thlenin, in chhungkhur thlengin a nghawng a, chu vang chuan rilru hriselna hi ngaih pawimawh a ṭul hle a ni, a ti a. Vanduaina leh hlawhchhamna karah a eng zawnga thil thlir thiam a, beiseina nena nun hman tlat chu rilru hrisel neihna leh hlawhtlinna kailawn pawimawh tak a nih thu a sawi.

Lunglei DLSA Chairman, District & Sessions Judge Pu Vanlalenmawia chuan hun a kaihruai a. Khual zahawm, Lunglei District Bawrhsap Pu R. Lalṭhazuala chuan District Jail-a chuti ang hun buatsaih a ni chu lawmawm a tih thu leh DLSA ruahmanna avanga a rilrua awm reng, jail tlawh theihna hun remchang a nei chu lawmawm a tih thu a sawi a. Jail tangte chu rilru put hmang dik nei tura chahin, jail tang an nih avanga hremna tuar ta viau emaw, khawtlang endawng phur ta viau emaw zawnga ngai lo tur leh an tana ṭha tura sawrkar ruahmanna a ni tih pawm thiam turin a chah a. Jail chu insiam ṭhatna hmun a ni tih hre reng tura chahin, a hrehawm leh a nawm lam aia mahni insiam ṭhatna tura a ṭangkaina lam zawk chu ngai pawimawh turin jail tangte chu a fuih a ni.

Lunglei District Jail Superintendent mawhphurhna la mektu, Lunglei Sub-Deputy Commissioner Pi Lalrampari chuan report pein, District Jail Lunglei chu September ni 19, 1977-a luah ṭan a nih thu te, ven himna (security) lam hna chu Mizoram Home Guard te'n an thawh thu leh jail chhung security erawh chu Jail Warder te'n an thawh thu te a tar lang a. Lunglei District Jail chu mipa 99 leh hmeichhia 10 awm theihna tura ruahman a ni chungin, a aia tam an awm deuh reng tih a sawi a. Tun dinhmunah mipa 114 leh hmeichhia 19, an vaiin tang 133 an awm mek tih a tar lang a. Thawktu lam indaih lohna leh mamawh an neihte a tar lang bawk.

Vawiina Jail Visitor Board-in District Jail Lunglei an tlawh puala inkhawmah hian jail tangte'n harsatna an neihte an sawina hun leh an thil hriat duh an zawhna hun hawn niin, DLSA lam aṭangin chhan leh hrilhfiah an ni a. DLSA Band te'n zaiin hun hmangtute an awi bawk a. Mi thiamte aṭanga mental health chungchang leh criminal law thar pathum chungchang ngaihthlak a nih hnuah, zawhna leh chhanna hun hman a ni bawk a. Lunglei DLSA Secretary, Chief Judicial Magistrate Pi Lalthansiami Hnamte chuan lawm thu sawiin hun a khar a ni.

Vawiina District Jail Lungleia hun hmannaah hian LMC Ward No. V Councillor Pi Zonunmawii, Lunglei District Superintendent of Police Pu J. Lalmuankima leh sawrkar department hrang hrang ai awhte, District MJA, Sub-Headquarters YMA leh Sub-Headquarters MHIP ai awhte leh DLSA-a thawktute an tel a ni.

Attachment

  • Loading attachment...