Press Information Bureau (PIB), Government of India, Aizawl huaihawtin vawiin khan Sub-Hqrs YMA Conference Hall, Venglai-ah Lunglei District huamchhunga thuthar thehdarhtute (media persons) tan ‘Regional Workshop on Improving Information Dissemination in Rural Areas’ neih a ni a. He Workshop Pu Mangjangam Touthang, DD(M&C), PIB kaihhruaiah hian Lunglei khawchhung bakah Hnahthial, Lungsen, Chawngte leh Haulawng atangin chanchinbumite, electronic media-a thawkte, Mizo Academy of Letters (Lunglei) member te, Kohhran leh YMA chanchinbu enkawltute an tel.

Workshop hawnnaah Keynote Address sawitu Pu C.Lalsangliana, IIS(Rtd) chuan ‘Role of Journalists in Rural Areas for Effective Communication’ thupui sawizauvin democracy ram India angah hian a chhunga cheng mipuite chu bengvar taka siam leh ramchhung thil kalhmang tinreng hre ve zel tura buatsaih a pawimawh hle a, chumi atan chuan Journalist-te chu sorkar leh mipui inkara ‘palai’ leh ‘ralvengtu’ hnathawktute an ni, a ti a. Lunglei District chu thingtlang hmun ‘rural area’ anga chhiar a la nih avangin Sorkar laipui pawhin tan lain ruahmanna hrang hrang a rawn siam thin a, chu chu mipuiten hman tangkai dan kan thiam ve a ngai a. Sorkar leh mipuite inkara hnathawk an nih avangin journalist-te chu midang siam sa, ziah sa ‘second-hand news’ ringawt ring lovin thingtlang mipuite chu hlat lova an mar phu dek phak turin an awm tur a ni, a ti a. India ramah mipui chanvo humhalhna Dan tha tak RTI Act kan nei chu tun aia chhawr tam leh hmang tangkai turin media-te a fuih bawk.

Lunglei DC Pu Ashish Madhaorao More, IAS pawhin ‘Role of Media in Crisis Management’ chungchang sawiin thuthar thehdarhtute chu District administration kengkawhtu, officials te nena thawkho tur an ni a, chhiatrupna thil a lo thleng a nih pawhin mipuite hnenah chanchin dik leh sorkar hmalaknate hrilh hre turin inngheng renga awm tur an ni, a ti a. Media hi democracy chawikangtu ban 4-na ‘fourth estate’ tia sawi thin a ni a, chuvangin democracy hlawhtlin nan he ban hi chak leh nghet taka a inphun hi a pawimawh hle a. Democracy-ah chuan ram chhunga cheng mihringte chu ngaih pawimawh ber an nih angin an chanvo tur dik tak an hmuh em tih finfiahtu tur chu media-te an ni, a ti. Information & Communication Technology hmasawnna avangin khawvel khawi hmun atang pawhin chanchinthar tharlam ber berte chu social media hmangin tupawhin an thehdarh theih laiin chanchinbumite pawimawhna chu chanchin belhchian tlak leh thudik chauh phochhuak turin an tangkai a, mipui pawhin chanchinbu (traditional newspapers) chu innghahtlak leh rintlak berah an nei a ni, a ti bawk.

Pu Mangjangam Touthang, DD(M&C), PIB chuan Press Information Bureau hnathawh dan leh hmalaknate a tarlang a. Sorkar laipuiin ramchhung hmun kilkhawr bera awmte hnenah pawh sorkar hmalaknate leh mipuite hamthatna tura ruahmanna a siam te hrilhhriat a duh a, mipuite ngaihdan leh mamawh pawh a hre duh thin a ni. Hemi palai hna thawk tur hian PIB hi sorkar hmarua ber a ni, a ti.

Vawiin Workshop-ah hian Lunglei DIPRO Pi Mina Zoliani chuan ‘Role of Journalists in Effective Communication’ chungchang a sawi a; Pu J.Malsawmzuala Vanchhawng, Copy Editor, DD News Aizawl-in ‘Media Ethics & Art of Reporting’ thupui hmangin thu a sawi bawk a. MJA Lunglei President Pu K.Lalrinpui chuan ‘Vernacular Newspapers for Effective Communication’ leh Lungei Times Editor Pu H.Lalthansanga chuan ‘ Importance & Role of Small & Medium Newspapers in Development’ thupuite hmangin hun an hmang bawk a ni.