1966/2022-2023 

Lunglei the 17th September, 2022 - Lunglei District chhunga Environment humhalh kawnga Dan hrang hrangte zawm anih theihna tura hmalatu leh thuneitu ‘Lunglei District Monitoring Committee On Compliance Of Environmental Laws’ chuan vawiin khan an Chairman Lunglei DC Pu Kulothungan A hovin NH-54-a hnathawh mek tlawhin leivung an paih dan, spoil bank an neih zat te leh leivung dalna gabion wall leh protective wall an neih leh neihloh te a hmunah enfiah a ni.

Vawiin Verification-ah hian NH-54 Package V (Dawn to Thualthu) enfiah niin Hrangchalkawn, Theiriat, Thaizawl, Bualte, Thualthu, Lungpuizawl, Zobawk leh Dawn te an tlawh a ni. Helai hnathawktu contractor ABCI Hrangchalkawn Project Manager Pu Amarjit Singh report danin Package V hnuaiah hian leivung paihna hmun tura ruat (designated spoil bank) 25 awmin heng zinga 15-ah leivung daltu gabion wall leh protective wall-te siam tawh niin tun dinhmunah leivung daltu gabion/protective wall hmun thum (3) ah siam leh mek a ni a, hmun sarih (7) ah hmalak ala ni lo a ni. Heng spoil bank 25 zingah hian tun dinhmuna hman mek lai chu pasarih (7) a nih thu a report bawk.

Lunglei DC Pu Kulothungan A chuan Lunglei District huamchhunga National Highway hnathawh mek pahnih NH-54 leh NH-302 te chu kan ram economy than len zelnan an pawimawh takzet rualin heng kawngpui laih avanga environment tih chhiat anih lohnan contractor ten Environmental Laws uluk taka an zawm a tul a ni, a ti a. Hemi chungchang hi District Monitoring Committee chuan strict taka kenkawh zel an tum thu sawiin Dan bawhchhia te chungah a tul anga action lak a nih tur thu a sawi a. Designated spoil bank-ah te leivung daltu gabion/protective wall sa tura chak taka hma la turin a hriattir a ni.

Leivung daltu gabion wall leh protective wall-te hi drone hmanga enfiah niin a sak dan tha tawklo leh leivung in a hnawl chhiat tawh te siam tha thuai turin Verification Team te chuan an hriattir a. Leivung paihna hmun tura ruat (designated spoil bank) pawn lamah paih lo tura hriattir in veng/khua VC-te chu lo ven pui tur leh hetiang hriat an neih chuan report vat turin an chah a ni.

Vawiin Verification team-ah hian Lunglei DC Pu Kulothungan A, Lunglei Settlement Officer Pu Alan Lalthanzara, Lunglei DIPRO Pi C. Lalremruati, Mizoram Pollution Control Board-a Senior Scientific Assistant Pu Joseph Lalhmunliana leh Land Revenue & Settlement Department leh ABCI thawktute an tel a. Veng/khua an tlawh naah khawtlang hruaituten an tawiawm bawk a ni.

Vawiin Verification hi Lunglei District Monitoring Committee On Compliance Of Environmental Laws ten tun hnaia verification an neih tum thumna (3-na) niin July ni 28, 2022 khan Lunglei DFO Pu PC Lalchhandama kaihhruaiin NH 54A leh NH 302 ah verification neih a ni a. September ni 6, 2022 khan Lunglei Additional Dc Pu V. Lalruatliana kaihhruaiin NH 54 Package VI - Tawipui N I&II, Tawipui South leh Thingfal ah te verification an nei a ni.  

Lunglei District huamchhunga hnathawhna te NH-54 (Package 3, 4, 5, 6) leh NH-302 (Package A&B) ah a vaiin leivung paihna hmun tura ruat (designated spoil bank) 85 a awm a ni.

Attachment

  • Loading attachment...