Vawiin chhun khan Convention Centre, Lunglei ah Pi K. Lalrinzuali, District Election Officer, Lunglei kaihhruaina in Mizoram MP (LS) inthlanna a Lunglei District Assembly Constituency pasarih (7) atanga Polling Station pakhat (1) theuh Randomization software hmanga thlanchhuah te Pu H. Lallean Songate, IRS, Observer hova Scrutiny (enfiah)na neih ani.

Pi K. Lalrinzuali, District Election Officer chuan thuhma sawiin MP (LS) inthlanna a Presiding Officer leh Polling Official te hmalakna leh inpekna avangin inthlanna felfai tak kan nei thei hi lawmawm ati a.Harsatna liantham thleng a awm lova, amaherawhchu Malsuri khua a lei a chhiat avangin Polling Official thenkhat te ke a kal angaih chu pawi ati a.  Polling Official te chu khua leh tui tha hlenchhuaktu in ni ati bawk.

 Pu H. Lallean Songate, IRS , Observer pawhin thusawiin Lunglei District huam chhunga inthlanna felfai leh muanawm neih anih avangin Election Commission of India aiawhin lawmthu a sawi a,Lunglei District Election Officer ruahmana leh  hmalakna te chu fakawm ati a, Saikuti Hall a Polling Official te lo dawnsawn chu hmun danga ala hmuh ngailo thu a sawi bawk. Inthlanna tluang taka neih theihna chhan chu Polling Official te leh Election kaihhnawi te nena thawhhona that vang ani ati, thawhhona tha tak hi chhunzawm zel turin a duh ani. Dingdi Polling Station a hmeichhia hlang duty te chu tangkai taka hman theih a an awm chu abik takin lawmthu  sawiin, Scrutiny endik te chu lungawithlak a ti bawk.

Pu James Lalnithanga, Election Officer, Lunglei kaihhruainain South Tuipui A/C atangin Thingsai II, Lunglei North A/C atangin Pukpui I, Lunglei East A/C atangin Canmari II, Lunglei West A/C atangin Venglai II, Lunglei South A/C atangin Lunglawn II, Thorang A/C atangin Terabonia leh West Tuipui atangin Malsuri Polling Station te hi Observer, Officer incharge leh PRO ten an  endik ani.