Vawiin chawhma dar 10:00 khan Lunglei SP Conference Hall-ah Lunglei District Police Half Yearly Crime Review neih a ni a. Lunglei SP Pu Zosangliana review meeting kaihhruai ah hian Addl. SP, APP leh Lunglei district chhunga SDPO, O/C, Lunglei PS-a case Investigating Officer zawng zawng an tel a ni.

Pu Zosangliana chuan Lunglei District chhungah case conviction rate a tha thawkhat hle a, a thawktute inpekna rah a ni a ti a. Tun aia nasa lehzual a thawkrim tur leh dan leh thupek kenkawhna chungchangah theihtawp chhuah turin a chah nghal a ni.

Nikum January leh June inkar khan case registered zawng zawng chu 91 niin kuminah June thla thleng khan case registered zawng zawng 166 a ni ve thung a ni. Nikum Jan-June khan rukruk thubuai chu case 45 ziahluh niin, kuminah June thla thleng khan case 72 ziahluh tawh a ni. MLPC Act hnuai leh inchhung khura buaina siam case chu kuminah June thla thleng khan 153 niin mi 172 hrem an ni tawh a ni. Tun dinhmuna Lunglei District-a case pending zawng zawng chu 87 a ni.

Dan phalloh a damdawi kawl mum 3800 man niin tualchhung rate a chhutin Rs. 2,85,00/- a ni a. Ganja kg 25 man leh niin, aman hi tualchhung rate a chhutin Rs. 45,000/- a ni. A neitute chu man nghal niin thubuai siam sak an ni bawk.

Kumin chhung khan ILP checking tum 8 neih niin, ILP violator mi 56 man an ni tawh a. Kuminah June thla thleng khan traffic-in dan bawhchhiate hnen atangin cheng 3,91,650/- an hmu a. Nikum January atanga June thleng khan cheng 4,58,250/- hmuh a  ni thung.