Vawiin khan Lunglei District Road Safety Committee chu an Chairman Lunglei DC Pi K. Lalrinzuali hovin Lunglei District chhung kawng humhalh chungchang leh mipuite an lo him zawk theihna tura hmalak dan tur sawiho turin DC Office Chamber-ah an thukhawm. Meeting-ah hian a kaihhnawih sawrkar Department hotute bakah Sub Hqrs YMA leh Zoram Drivers Union (ZDU) hruaitute an tel.

Chairman Lunglei Bawrhsap Pi K. Larinzuali chuan India ram chhungah lirthei chetsualna a tam a, nunna, sum leh pai leh hun kan hloh hi a tam em em a ni, a ti a. Mizoram leh Lunglei District chhung ngeiah pawh vanduaina hi a thleng fova, chuvang chuan heng chhiatna laka kan lo hima, hma kan sawn theih nan Road Safety Committee hi din a ni tiin mipuite an lo him zawk theihna tura theihtawp chhuah theuh turin Committee member-te a sawm.

Lunglei SP Pu C. Lalthanmawia chuan Lunglei Traffic Police ten Road Safety leh Traffic Dan zawm chungchangah Special Drive an neih thin thu sawiin Traffic Dan bawhchhiate fine chawi tir an nih thin thu a tarlang a. Lunglei District huamchhunga Traffic Dan bawhchhiate Traffic Compounding fine kum 2017 khan Rs.9,74,320/- kum 2018 ah Rs.8,09,875/- leh kumin January atanga July thlengin Rs. 4,27,200/- chawi tir an nih thu a tarlang. Lirthei chetsualna avanga nunna chan pawh kum tin awmin kum 2017 khan mi paruk (6), kum 2018 khan mi sawmpariat (18) leh kuminah mi panga (5) ten nunna an chan tawh thu District Road Safety Committee member-te a hrait tir bawk. Lunglei khawpui a lo him zawk theihna turin Lunglei Town Surveillance Project pawh kalpui mek niin 1st Phase-ah CCTV Camera 38 hmun lun laiah vuah a ni tawh thu Lunglei SP hian a sawilawng bawk.

Committee hian Lunglei District chhung kawng humhalh chu tun aia chak zawka kalpui anih theih nan Road Protection Squad din thar leh ni se tih a rel a. Tin, Road Protection Squad hi District Level leh Town Level mai bakah Village/Locality Level thleng din ni se tih Committee chuan a rel a. A tulna hmunah te Reflector dah rel anih bakah District chhunga chetsualna thlen zinna lai Accident prone area-ah te Signboard tar ni se tih an rel bawk. Tin, hemi kawnga hma la tak tak turin pawisa indaihlohna a nasat thin avangin Lunglei District tan Road Safety Fund nei turin Department ah dilna thehluh ni se tih rel a ni bawk. Tin, khaw chhunga kawng nek zawng leh ti hnawk zawnga bungrua leh hmanraw dah hote then faite, dan lova lirthei khalh te, No Parking Area-a park lui te, rui chunga lirthei khalh te, truck terminal mamawh chungchang te sawiho a ni. Lunglei District Road Safety Action Plan pawh siam tur niin hei hi Lunglei SDPO kutah dah a ni. School, College leh a tulna hmunah te Awareness Campaign neih thin ni se tih Committee chuan a rel bawk.

District Road Safety Committee hi Mizoram sawrkar chuan Section 215 (3) of the Motor Vehicles Act, 1988 behchhanin 19th December, 2016 khan District tinah a din a ni.