Kum dang ang bawkin India ram pumpuiah, Teachers' Day chu kumin hian India miropui  Dr Sarvepalli Radakrishna piancham, September 5 hian hman a ni  leh dawn a ni. He hun hmang tur hian Mizoram  chhunga District hrang hrangte pawh an inpuah chah mek a. Aizawl District chhunga he Ni pawimawh tak hman dan tur relin vawiin khan Aizawl District Bawrhsap Pisaah Aizawl District Working Committee on National Teacher's Welfare(NFTW) chu Pu John LT Sanga, Addl. Deputy Commissioner kaihhruaiin an thu khawm  a ni.

Chairman hnen atangin meeting koh a nih chhan te ngaihthlak hmasak a ni a; nikum lama Teachers' Day hman dan tlangpui te Pu Zohmingthanga, District Education Officer, Aizawl District hnen atangin tawi fel takin ngaihthlak a ni leh a. Hemi hnu hian kumina Teachers' Day hman dan tura ruahmanna thehluhte sawiho a ni. Kuminah hian Teachers' Day  chu veng tinah a remchan dan ang angin Local Council leh NGO te bakah vengchhung nu leh pa phung bawmna  sawmin hman ni se tiin Committee chuan a rel a. He hunah hian zirtirtu te chawimawina hun hlung taka hman a ni dawn a. Zirtirtu thawk tha zual, National Level-a chawimawina dawngtute leh State chawimawina dawngtute phei chu Teachers' Day-ah hian an programme hmanna hmunah te thutna  tur bik siamsak leh thusawina hun pek te Meeting chuan a rawt a. Teachers' Day programme siamna hmunah zawng zawng  Teachers' Day puala  Minister thuchah leh a remchan anga Dr Sarvepalli Radakrishna chanchin chhiarchhuah  hun buatsaih te pawh  rel a ni.