Vawiin chawhnu khan Lunglei Circuit House, Conference Hall-ah Lunglei District Screening Committee on Pradhan Mantri Awas Yojana-Housing for All (Urban) an thukhawm a. Lunglei District-a bialtu MLA te telin, Lunglei DC Pu Abhijit Vijay Chaudhari, IAS-in a kaihruai a ni.

Lunglei District Urban Development Officer leh Member-Secretary ni bawk Pu Andrew Lalhruaia chuan PMAY-HFA (Urban) 2022 Mission hnuaiah insak tanpuina Vertical pahnih – Beneficiary-Led Construction (BLC) leh Credit Linked Subsidy Scheme (CLSS) te chu kalpui tum a nih thu a sawi a. Mizoramah Census Town 23 awm in, Lunglei District-a Census Town pathum – Lunglei, Hnahthial leh Tlabung ah te kalpui tum a ni a ti. Insak tanpuina dilna hawn chhung hian, BLC hnuaiah Lunglei atangin 2888, Hnahthial atangin 463 leh Tlabung atangin 639 dilna form thehluh a nih thu a tarlang a. Lunglei atangin CLSS hnuaiah insak tanpuina dil 1775 an awm thu a sawi.

District Screening Committee chuan a diltute enfiah tur hian department mi te bakah Village Council te thawhho pui ah sawm nise a ti a. Verification tihfel a nih hnu ah, scheme dawng tlak ngei te hnenah insak tanpuina hi pek nise a ti bawk.

Meeting ah hian Lunglei District-a bialtu MLA – Pu PC Lalthanliana, Pu Joseph Lalhimpuia, Pu Nihar Kanti Chakma leh Pu Chalrosanga te an tel a. Heng bakah hian sawrkar official leh bank aiawh te in an tel a ni.

Beneficiary-Led Construction (BLC) hi insak tanpuina cheng nuai khat leh singnga pek theihna a ni a. A diltu chu Economically Weaker Section (EWS), kum khata cheng nuai 3 aia tlem lalut an ni tur a ni. Credit Linked Subsidy Scheme (CLSS) hi housing loan bank kaltlanga pek tur a ni a, Ministry of Housing and Urban Poverty Alleviation hian Central Nodal Agency (NHB leh HUDCO) te kaltlangin bank hnenah housing loan subsidy 6.5% a pe dawn a ni.