MIFCO Chairman leh Kolasib Bialtu MLA ni bawk Pu P.C. Zoram Sangliana chuan vawiin chawhma dar 11:30 khan NEC Secretariat, Shillongah NEC Secretary Ram Muivah a hmu a. Kolasib bial chhunga hmalakna hrang hranga NEC fund hman tangkai dan tur a sawipui.

Mizoram State priority list ami, 'Multi Utility Centre with Auditorium' Kolasib-a sakna tur, NEC in project sanction tur zinga an la telh lo chu ngaihpawimawh hmasaka nei turin a ngen a. CM pawhin a ngaihpawimawh leh DO letter nen hiala a umzui a nihzia te hrethiamin NEC Secretary Pu Muivah pawhin Meeting leh hmasaberah an lo ngaihtuah tur thu leh a lo ngaihpawimawh ngei tur thu a hrilh.

Hemi bakah hian Kolasib bial chhunga project awm mek leh beisei mek, a bik takin Bairabi Bridge kalpawhna approach road siam chungchangte a sawipui a. NEC Secretary hian a project kalpui dan tur thurawn leh rawtna tha tak tak te lo pein a theih chin chinah a lo ngaihpawimawh tur thu a sawi. NEC Secretary mai bakah Pu Zoram Sangliana hian NEC Secretariat-a officer dangte pawh a tlawh bawk.

Pu P.C. Zoram Sangliana hi Pu K. Lalsawmvela, Chief Engineer, PWD leh Pu Jacob Lalawmpuia, Dy. Resident Commissioner, Shillong ten an tawiawm.