Vawiin chawhma khan Lunglei District Swachh Bharat Mission (Gramin) chu an Chairman Lunglei DC Pi Lalzarmawii, IAS kaihhruaina in a Office Chamber-ah an thukhawm a. Lunglei District huamchhunga thlingtlang khaw  hrang hrang a chhungkaw ek in la neilo leh ek in nei thalo te SBM (G) scheme hnuaia ek in sak sak dan tur leh siam that sak dan tur sawiho a ni a. Lunglei District chu ulau taka zun leh ek thiar kawnga district fihlim - Open Defecation Free (ODF) a nih ve thuai theihna tura sawrkar Department-te hnathawh kal mek thlirho a nih bakah kumin chhunga hna kalpui zel dan tur te meeting-ah hian sawiho a ni. 

Pi Lalzarmawii chuan kawng tinrenga hmasawn tur chuan faina leh thianghlimna a pawimawh a ni tiin Lunglei District chu khawlaia inthiar awmlohna District ni tura theihtawp chhuah turin sawrkar official-te leh tlawmngai pawl aiawh kalkhawmte chu thawhho puiah a sawm a. 

EE PHED Lunglei Rural Watsan Division leh Member Secretary ni bawk Er Allan Lalthalura chuan meeting neih chhan sawi hawnna neiin SBM (G) kal tlangin Lunglei District chu khawlaia inthiar awm lohna, chhung tinin inthiarna ek in tha tawk an neih vekna District ni turin chak taka hmalak mek a nih thu a sawi a. Lunglei District-ah SBM (G) kalpui a nih atanga August 2017 thleng khan chhungkaw 3879-te tan ek in (Individual Household Latrine-IHHL) sak sak an nih tawh thu a tarlang a.  Tun dinhmunah Lunglei RD Block leh Hnathial RD Block-ah te chhungkaw ek in nei lote tan ek in sak sak vek an ni tawh a, khawthlang lam Bunghmun RD Block leh Lungsen RD Block-ah te ek-in sak tur hmabak 6062 a la awm thu a sawi bawk. 

Meeting-ah hian Lungsen Block leh Bunghmun Block –a IHHL ek in sak tur hmabak kalpui zel dan tur te, sawrkar laipui leh state sawrkar atanga pawisa dawn tawh dinhmun te, ek in sakna tur hmanrua chungchang te sawiho a ni a. Committee chuan Hnahthial Block leh Lunglei Block-a ek in sak tawh enfiahna runpui Block Level Verification chu tun thla Septmber zawh hma ngeiin neih ni se tih a rel a. He enfiahna kalpui tur hian Block Level Team din a ni dawn a, bialtu BDO chu Chairman niin bialtu SDO, PHE chu Member-Secretary a ni anga, SDEO, CDPO, anganwadi worker, ASHA worker leh YMA, MHIP leh MUP aiawhte an tel bawk ang. He Block Level Team-hian khawchhunga in 20%, Zirna in hrang hrang leh Community Hall an endik vek dawn a ni. Committee chuan Lunglei District huamchhunga ek in sak tawh te mipuiin tha tak leh felfai taka enkawl zui zel turin DC-in thuchhuah siam se tih a rel bawk.