Naupang kum 0-2 inkar leh nu naupai te hridanna Vaccine pek kim tura Sorkar Laipuiin ruahmanna a kalpui mek ‘Mission Indradhanush’ chu Lunglei District atan thla hmasa April ni 7, 2015 khan hawn a ni a. Vawiin khan he Mission hnuaia hmalak tawhna te thlir hovin Lunglei Addl DC Pu H.Lianzela kaihruaina hnuaiah aa office chamber-ah ‘District Task Force on Immunisation’ an thukhawm.

Lunglei CMO Dr.VLMS Dawngliana leh District Immunisation Officer Dr. Lalparliani ten Mission Indradhanush kalpui a nih mek dan te leh an hmalak tawhna te an tarlang a. Lunglei District-ah chuan heng khua - Tlabung, Bunghmun, Buarpui, Lungsen leh Hnahthial - te chu Vaccine pekkim loh tamna khuate a ni tih hmuhchhuah a ni a, Health Department hnuaia Health Worker-te bakah ASHA Volunteers te chu in tinah lutin nausen/naupang leh nu naupai vaccine la la kim lote a lunungin an chhiar vek tawh a ni. Tun dinhmunah chuan Lunglei District huamchhunga Vaccine pek ngai target chu 333 a nih tih chhinchhiah a ni tawh a, Hnahthialah phei chuan naupang 3 chiahin vaccine lak hmabak tawhin thla lehah vaccine pek zawh an ni ang tih an sawi a. Ministry of Health lamin he Mission atana sum an hman tur an la rawn pek loh vangin harsatna an tawh thu te, hmun kilkhawr tak tak - tawng inhriatpawh lohna, kawng awm mumal lohna leh mobile connectivity chhiat lutuk avangin duh angin hmalak chak a har tih thu pawh an tarlang a. Chuti chung chuan a theih ang angin awareness programme kalpui mek a nih thu leh vaccine zawng zawng pawh nei kim tawhin an pekna tur hmunah semchhuah vek tawh a ni tih DIO chuan a sawi a. Vaccine pekkim ngaihna khua 5-ah te chuan an khawtlang hruaitute leh NGO te nen thawhhona siamin inhrilhriatna hun ‘Sensitisation Programme’ hman ngei nise tih Committee in a rawt bawk. 'Mission Indradhanush' hnuaiah hian tun thla May ni 7/8 khian Vaccine pek runpui bei a ni leh nghe nghe dawn a ni.

Addl DC Pu H.Lianzela chuan harsatna karah pawh Health Deaprtment hotute leh hnathawkten theihtawp an chhuah mek chu fakawm a tih thu a sawi a, Department bakah Media leh NGO lamte nena thawhho a tulzia sawiin chanchinbu leh radio hmangte pawhin hmun kilkhawr zawka awmte hrilhhriat zel a pawimawh a ni, a ti.