Vawiin chawhma khan Lunglei District Water and Sanitation Committee chu an Chairman Lunglei DC Pi Lalzarmawii, IAS kaihhruaiin a Office Chamber-ah an thukhawm. Meeting-ah hian Lungei District huamchhunga Swachh Bharat Mission (Gramin) hmalakna kum 2017-2018 – a kalpui dan thlirletna neiin, kumin 2018-2019 chhunga hmalak dan tur an sawiho.

Pi Lalzarmawii chuan hmasawnna tluantling nei tur chuan thianghlimna leh faina kan ngaih pawimawh hmasak a tul a ni tiin Lunglei District chu ulau taka zun leh ek thiar kawnga district fihlim - Open Defecation Free (ODF) a nih ve thuai theihna tura sawrkar Department-te hmalakna chu fakawm a tih thu a sawi a. Lunglei District chuan faina leh hriselna kawngah hma kan sawn chho zel a, hun lo kal zel turah theihtawp kan chhuah tlan a tul a ni tiin Swachh Bharat Mission thil tum te ti hlawhtling turin mipuite thawhho puiah a sawm.

EE PHED Lunglei Rural Watsan Division leh Member Secretary ni bawk Er Allan Lalthalura chuan meeting neih chhan sawi hawnna neiin SBM (G) kal tlangin Lunglei District chu khawlaia inthiar awm lohna, chhung tinin inthiarna ek in tha tawk an neih vekna District ni turin chak taka hmalak mek a nih thu a tarlang a. Thlingtlang khaw  hrang hrang a chhungkaw ek in la neilo leh ek in nei thalo te chu SBM (G) scheme kaltlang hian ek in sak sak an ni a. Lunglei District chhunga RD Block pali – Lunglei, Hnahthial, Lungsen leh Bunghmun chhunga SBM(G) ek in (Individual Household Latrine-IHHL) sak tur zawng zawng chu tun dinhmunah zawh fel tawh niin April 2017 – February 2018 hun chhung khan IHHL 8037 sak a ni. Lunglei District IHHL target zawh fel tawh anih hnu hian Open Defecation Free (ODF) District-a puan thuai a nih theih nan Block Level, District Level leh State Level ODF Verification neih la hmabak a ni.

Er Allan Lalthalura chuan SBM(G) hnuaia kum 2018-2019 chhunga an hmalak dan tur sawifiahna hun a hmang bawk a. Faina leh thianghlimna kawnga mipuite ziritirna kawngah nasa zawka tan lak an tum thu a tarlang a, khua leh school hrang hrang ah te Awareness Campaign chak taka kalpui tum a ni. Vantlang zun in leh ek in changtlung tak District chhunga khaw 20 ah sak tum a ni bawk. Hemi bakah hian bawlhhlawh sawngbawlna hmun tur (Solid and Liquid Waste Management) chu khaw 35-ah siam tum a ni. 

Committee chuan ODF Verification chu neih thuai ni se tih a rel a, April ni 9 leh ni 10 hian Lunglei DC hovin District Level Verification team ten khaw hrang hrang an tlawh kual dawn a ni.