13/2022-2023
Lunglei the 1st April, 2022: Vawiin khan Lunglei High Powered Committee Vice Chairman Pu Lawmawma Tochhawng chuan HPC Lunglei hmalakna peng thar HPC Eri Development Scheme chu Lunglei District Sericulture Office-ah a hawng.

He hmalakna hnuaiah hian Lunglei District chhunga kuthnathawktu chhungkaw 10-te Eri Silkworm farming ti tura thlan niin silkworm khawina in (Rearing House) sakna atan cheng sing sarih (Rs.70,000/-) theuh leh silkworm subsidy cheng 1500 leh hmanraw dangte an dawng dawn a. Scheme hi kum khat chhung awh tur niin Installment thum a pekchhuah tur a ni a. Vawiin khan HPC Vice Chairman hian 1st Instalment a hlan a ni.

Vawiin hawnna program Pu S. Lalrintluanga, SEO, Lunglei kaaihhruaiah Pu Lawmawma Tochhawng chuan thu sawiin khawvelin Covid-19 hripui avangin hun harsa tak a hmachhawn a, ei leh bara intodelh leh kuthnathawktute tih hmasawn a pawimawh zia a lang chiang hle a. HPC Lunglei pawhin kuthnathawktute hmasawnna turin theihtawp a chhuah zel dawn a, kan kutkawih ngeia kan thar leh siam chhuah, project tha leh tlo kalpuia mipui tam zawkte tana eizawnna ngelnghet siam sak hi kan tum ber a ni, a ti a. Silk chu a hralhchhuahna ah harsatna a awmloh avang leh kum khatah vawi engemawzat tharchhuah theih anih avangin uar leh zuala hmalak tlak a ni tiin Kawrpuichhuah kaltlanga Indo-Bangladesh border trade la awm turah pawh hralh a kal hle dawn a ni, a ti a. Eri Development Scheme hlawhtlinna turin beneficiary leh Department-ten mawhphurna sang tak an nei a ni tiin hmathlir hui tak nei chunga hma la tura chahin HPC Lunglei chuan uluk takin a vil zui reng dawn a ni, a ti bawk.

Pu B. Lalrinliana, Director, Sericulture Department pawhin thu sawiin kuthnathawktute hmakhua ngaia an tan Scheme tha tak buatsaih sak tu Lunglei High Powered Committee chungah lawmthu a sawi a. HPC Eri Development Schemechu kum khat chhung awh tur niin hei hi kuthnathawktute din chhuah theihna tura bultanna tur chauh a ni tiin farmer thlanchhuah te chu hmathlir thui tak nei chunga he Scheme hi dik taka kalpui turin a chah a.

Vawiin program ah hian Pu B. Lalchhuana, District Sericulture Officer Lunglei chuan powerpoint hmangin zirtirna pe in, beneficiary lampang atang pawhin thusawina ngaihthlak a ni.

Beneficiary thlanchhuah te hi Zobawk veng atangin chhungkaw 2, Farm Veng atangin chhungkaw 2, Zotuitlang atangin chhungkaw 2 leh Tawipui N II, Thualthu, Rahsiveng leh Vanhne atangin chhungkaw pakhat theuh an ni.