No.1272/2020-2020

High Powered Committee, Lunglei District hnuaia artuia intodelh tura hmalakna atanga tharchhuah ‘HPC Artui’ chu vawiin khan HPC Vice Chairman Pu Lawmawma Tochhawng chuan a office Conference Hall-ah a tlangzarh. 

Hawnna inkhawm HPC Lunglei Chief Planning Officer Pu Vanlalmuana  kaihhruaiah HPC Vice Chairman chuan artuia Lunglei District a intodelh theihna tura hmalaknaa hlawhtlinna hmuh chhoh mek chu lawmawm a tih thu sawiin hemi atana Chief Minister, Lunglei HPC Chairman ni bawk Pu Zoramthanga phur puina leh hmalakna avanga hetiang dinhmun thleng thei an nih thu a sawi. Lunglei ar vulhtu society hrang hrangte taihmakna chu fakawm a tih thu sawiin hmasawnna kawng zawh zel turin thahnemngai taka bei chhunzawm turin a chah a. A kaihhnawih Department hnathawkte thawhrimna leh inpekna chu chhuanawm tiin an chungah lawmthu a sawi a. He hmalakna hi thalaite tana fuihna leh chona thar siamtu ni thei se a duh thu sawiin thalai tam zawkte mahni kutkawiha eizawnna (entrepreneurship) kawng zawh tura HPC kaltlanga hmalak chhungzawm zel a tum thu a sawi. 

Covid-19 avanga khawvel pumin harsatna a tawh mek leh Mizoram pawhin ikharkhip thawh lina kan kalpui mek chungchang pawh sawiin HPC Vice Chairman chuan sawrkarin tih tur leh tih loh tur a tih te tha taka zawm tlat turin mipuite a chah nawn leh a. He hun harsa tak kan tawn mek lai hian mi tumah riltam leh chhuanchham in an awm sawrkarin a phal lova, mi harsate tanpui tur leh ei leh bar leh thlai tam zawk tharchhuak turin theihtawp kan chhuah chhunzawm zel dawn a ni, a ti bawk.

Lunglei DVO Dr Vanlahruaia chuan Technical Report pein ‘HPC Artui’ project hi Cooperative Society panga - Zobawk S, Ramthar, Pukpui, College Veng leh Lunglawn te kaltlanga kalpui niin Rainbow Rooster ar note 10,000-in nikum December thla khan bultan a ni a. Ar in sakna leh a tul dangte pawh ngaihven sak an ni. Dr Vanlahruaia chuan Rainbow Rooster an thlan chhan sawiin artui mai bakah hian a sa a tui avangin an tui theih tawhloh hnuah pawh a sa hralh a kal a, eizawnna atana a that thu a sawi.

Ar vulh mek Cooperative Society member te pawhin thu sawiin an ar vulh chu hlawk thlak an tih thu sawiin an artui chu hralh a kal hle a, tun dinhmunah mipuiin an hlutin an inchanlo zawk a ni, an ti. Ar vulh lamah nasa zawka hmalak chhunzawm  zel an tum thu an sawi bawk. 

He hunah hian ‘HPC Artui’ tharchhuah te pholan leh zawrh nghal a ni a, artui hi pum khat Rs. 12 /- a hralh chhuah a ni..