No.1269/2020-2020

Aizawl, the 21st May, 2020: Sawrkar chuan Quarantine Facitity hrang hrangah pawn lam atanga Mizoram rawn lut te ni 14 chhung an hriselna enthlak turin a dah mek a. Quarantine facility a awm mekte hriselna te chu uluk taka vil tha a ti a. He hna thawk tur hian a hnuaia tarlan ang hian ruahmanna a siam a ni.

COVID-19 dona kawnga Sawrkar hmalakna hrang hrang zingah, Mizoram pawn atanga mi lo lut tharte chu quarantine facility ah ni 14 chhung an hriselna enthlak tura dah hran tur tih chu Sawrkar thutlukna a ni a. Chutih laiin, Mizoram khua leh tui, ram pawn atanga rawn haw duh te chu an tam tham em avang leh an pun belh zel bawk avangin Sawrkar quarantine facility te chuan min dawl zo dawn lo nasa a. Chuvangin, Sawrkar chuan quarantine hmun tur te dap belhin nasa takin tan a la chho a. Chutiang karah chuan kohhran hrang hrang te’n a hun takah an hmun-hma leh sum leh pai te quarantine centre atana hman an inhuam thu Sawrkarin a dawng a, Kohhran- te inphalnaah Sawrkar chu a lawm takzet a ni.

Quarantine facility kan neih belh takah chuan kan mi dah te hriselna lo thlithlai tur doctor te kan indaihlo chho leh dawn ta a. Hemi chungchangah hian Indian Medical Association (IMA), Mizoram Government Doctors’ Association (MGDA)leh private hospital fawng vuantu te zing atanga din, Medical Operation Team te chu khawpui (AMC area) min vilpui tura ruat an ni. Aizawl khawpui bikah chuan Medical Operation Team-te’n quarantine facility chan bik insem felin, kan quarantine mek te hriselna te min thlithlai sak thin ang.

Aizawl district (AMC huam chhung ni lo) leh district danga quarantine te erawh chu Chief Medical Officer (CMO) theuh te mawhphurhna a ni zui zel ang.