No.1270/2020-2020

Law & Judicial Minister Pu TJ. Lalnuntluanga, Champhai South bialtu MLA chuan vawiin khan Champhai Town Planning kalpui mek hnuaia hmalakna pawimawh tak, Champhai khawpui tuamchhuaka inkalpawhna kawngpui Ring Road sial hnathawh tura hmalakna hmasa Champhai Zotlang leh Tlangsam inkalpawhna kawngpui kilometre 4.5 a thui, cheng nuai 306 senna tur siam mek chu Official-te leh khawtlang hruaitute nen an enfiah. Kawngpui laihzau hna hi kumin March thla laihawl atanga tan niin, White topping tih leh vek tur a ni ang.

Pu TJ. Lalnuntluanga chuan khawvel changkang zelah khawpuite a thang lianin a pui deuh deuha, khawpui tawt tiziaawma inkalpawhna kawng tha zawk neih theihna turin hmathlir thui tak neia Champhai Town Planning duan anih thu a sawi a. Nakin lawka harsatna awm theite thlirin a remchan lai tun huna hmalak a tul thu a sawi a. Kawngpui sial mek thawktute chu hna tlo leh tha, nakin zela rotling hnutchhiah tum turin a hrilh a, UD&PA Department Official-te pawh hnathawh mekte anihna ang taka thawh anih theihna turin uluk taka vil turin a chah a. Tlangsam leh Zote inkalpawhna tur kawng sial hna thawhna tur sum cheng nuai 100.9 pawh sawrkarin a remtih tawh thu a sawi bawk.

Kawng siam endikna hunah hian Minister hi Pu Vanlalchhuanliana DUDO Champhai, Dr.Lallawmkima DIPRO Champhai, UD&PA Engineer-te leh khawtlang hruaitu te’n an tawiawm a ni.

Law & Judicial Minister, Champhai South bialtu MLA nibawk Pu TJ Lalnuntluanga chuan tukin khan a bial chhung Champhai Venglai atanga HSLC Exam pass tharte lawmpuina thilpek Dictionary bu a hlan a. Minister chuan Zirlaite chu dikna tan ngamtu, diklohna tanlo ngamtu ni tur leh dikna, rinawmna leh taimakna nena mahni kut kea dinga intodelh tum thin turin a chah a. Inrintawkna leh tumruhna neia midangte tana malsawmna thlentu nih tum tlat turin a fuih a. Zirlaite chu tum mumal tak nei rana lehkha zir tura chahin, nakin huna an kal zel dan tur kawhhmuhna Career Guidance Programme huaihawt tuma rilru sen mek a nih thu a sawi bawk.