2812/2024-2025

2024 Sahmulphah thla ni 2: Lunglei High Powered Committee (HPC) leh Mizoram State Sports Council (MSSC) te bul tuma Mizoram Arm Wrestling Association (MAWA) leh Lunglei District Arm Wrestling Association (LDAWA) te ṭang kawpin Lunglei DEO Conference Hall-a inkut elh/inban buan chak ber zawnna, Mizoram Open Arm Wrestling Championship vawi 10-na an buatsaih chu vawiin khan Lunglei HPC Vice Chairman Pu V. Malsawmtluanga MLA chuan Khuallian nia hmanpuiin, a hawng.

Khuallian Pu V. Malsawmtluanga chuan Lungleia Mizoram pum huap inkut elh chak ber zawnna buatsaih a ni chu lawmawm a tih thu sawiin, arm wrestling association hruaitute ṭhahnem ngaihnaah lawm thu a sawi a. Tun hnaia Asian ArmWrestling Cup-a hlawhtlinna changa Mizote tihmingṭhatu inkut elh chakte chhuanawm a tih thu sawiin, inkut elh chu Mizote'n khawvel hriat kan hlawhna tur leh kan hlawhtlin theihna discipline pawimawh tak pakhat a ni tih a lang chiang tiin, inkut elh mi kal khawmte chu theih tawp chhuah turin a fuih a. Infiamna peng hrang hrang chu ei zawnna tlak a nih thu sawiin, ei zawn nana hman kher loh pawhin taksa leh rilru hriselna atan leh ruihhlo dona atana hmanraw ṭha tak a nih thu leh infiamnaa certificate ṭha chu zirna in ṭhaa luh theih nana puitu pawimawh tak a nih theih thu te a sawi a. Sawrkarin hna hrang hrang a la chho zel dawn tih sawiin, sipai leh police laknaah infiamna lam thei mi leh mi inthazo lak tam tum a ni dawn tih a sawi a. Infiam mi kal khawmte chu anmahnia theihna sang ber sawr chhuak turin thawh rimna leh taimakna nena bei zel turin a chah a ni.

HPC Mizoram Open Arm Wrestling Championship hawnna inkhawm hi LDAWA President Pu K. Lalrinpuia'n kaihruaiin, Salvation Army Southern Division-a DYS Capt. Timothy Lalhlimpuia'n hunserh a hmang a. Khual zahawm, Lunglei District Sports Committee (LDSC)-a Senior Vice Chairman Pu Pc. Lalramnghaka chuan Lungleia inelna nghah chu Lunglei District ṭhalaite'n inkut elh lama hmasawnna an neih theihna a nih a beisei thu sawiin, infiam mi kal khawmte chu mahni inthununna, tum ruhna leh chhelna nen theih tawp chhuah zel turin a chah a. LDAWA General Secretary Pu J. Lalzawmliana'n technical report pein, MAWA Vice President & Technical Chairman Pu Lalrivunga'n thu a sawi bawk a. LDAWA Senior Vice President Pu Lalnunpuia Tlau chuan lawm thu a sawi a. Exhibition match atan Khuallian leh khual zahawm te inkut elh hmasain, inelna chhunzawm nghal a ni.

Tun ṭuma Mizoram pum huap inkut elh chak zawnnaah hian district paruk - Aizawl, Lunglei, Kolasib, Lawngtlai, Mamit leh Hnahthial aṭangin infiam mi 87 an tel a ni.

Huang leh rih zawng hrang hranga chak berte chu:

1) 60 Kg Men - Andrew Vanlalpeka, Ramhlun Sports Complex

2) 70 Kg Men - Raymond K. Lalrinpuia, Lily Veng AWC

3) 80 Kg Men - Laldingliana, Rebel Gym

4) 90 Kg Men - Lalhmangaihzuala, Monster

5) 90+ Kg Men - C. Lalnunpuia, Lunglei

6) 60 Kg Women - Emily C. Rohluzuali, Lunglei

7) 70 Kg Women - C. Vanlalhruaizeli, Lunglei

8) 70+ Kg Women - Brenda Lalruatpuii, Lunglei

9) Champion of Champions Men - C. Lalnunpuia, Lunglei

Attachment

  • Loading attachment...