4444/2024-2025

Lunglei, 2025 Ramtuk thla ni 26: Vawiin chawhnu khan Lungleia C. Ṭhuamluaia Mualah Lunglei Sub-Headquarters Young Mizo Association (YMA) buatsaih HPC Inter-Branch YMA Futsal Tournament 2025 hmawr bawk niin, Lunglei High Powered Committee (HPC) Vice Chairman Pu V. Malsawmtluanga'n a hmanpui.

Lunglei HPC Vice Chairman Pu V. Malsawmtluanga chuan Lunglei District ṭhalaite'n infiamna leh kawng hrang hranga hma an sawn theih nan HPC kal tlangin theih tawpa hma lak tum a nih thu sawiin, infiamna, zirna, zai leh rimawi lama intihsiakna leh inelna hrang hrang sponsor tawh leh sponsor tura hmachhawp eng emaw zat a awm mek thu a sawi a. Sponsorship kal tlangin Lunglei District mipui leh ṭhalaiteah ṭhan harhna a thlen an beisei thu a sawi. HPC aṭang leh Mizoram sawrkar aṭangin department leh central sawrkar scheme kal tlangin Lunglei District-ah infiamna hmunhma tihchangtlunna tur hma lakna eng emaw zat a awm tih tar langin, Hauruangah hockey ground siamna tur tihfel a nih tawh thu te, hmun hrang hrangah mini sport complex leh indoor stadium sakna tur ruahman leh bawhzui mek a nih thu te a sawi a. Lungleia khelmual puitling tling pha chiah lo ṭhenkhat chu khelmual puitlinga siam tum a nih thu a sawi bawk.

Pu V. Malsawmtluanga chuan Mizoram sawrkar Bana Kaih ruahmanna hnuaiah Mizorama infiamna tihhmasawn nan "Empowering Mizoram Sports" kalpui a nih thu leh thingtlang khaw kilkhawr zawkah te training pek bakah, khaw hrang hranga sporting club-te hmanrua leh bungrua (equipment)-a thuam chak tum a nih thu a sawi a. Olympics Vision 2036-ah Lunglei District ṭhalai a tam thei ang ber tel tum tura fuihin, infiamnaa hlawhtling turin ruihhlo leh zuk leh hmuam laka inthiar fihlim bakah, ei leh in leh taksa vawn uluk a pawimawh tih a sawi a. Infiam mite chu infiamna chu intihhlim nana hmang satliah mai lo va, khelmual chhungah an theihna zawng zawng sawr chhuah tum tura chahin, inter-branch YMA futsal tournament-a telte chu tournament buatsaih chhan inunauna, thawh hona ṭha leh tlawmngaihna vultir te tihlawhtlingtu nih tum ṭheuh turin a chah bawk.

HPC Inter-Branch YMA Futsal Tournament 2025 hmawr bawkna hun hi Lunglei Sub-Headquarters YMA Sports Committee Vice Chairman Pu J. Lalmuankima'n kaihruaiin, Sports Committee Secretary Pu PS Lalngaihzuala'n report a pe a. Sub-Headquarters YMA Secretary Pu Zothanzuala Hnamte pawhin thu sawiin, Sports Committee Chairman Pu Francis Lalnuntluanga Ralte chuan lawm thu sawiin hun a khar a ni.

He tournament-ah hian Lunglei HPC chu main sponsor niin, Lunglei DRDO office hnuaia Watershed Yatra Campaign chu co-sponsor an ni a. Lunglei Sub-Headquarters YMA hnuaia YMA branch 20 aṭangin mipa (men's) team 28 leh hranghlui (veteran) team 12 an chhuak a. February ni 24, 2025 aṭang khan C. Ṭhuamluaia Mualah khelh ṭan niin, a zavaiin match 38 khelh a ni.

Mipa final-ah Chanmari Branch chuan Serkawn Branch hnehin an champion a. Veteran final-ah Electric Veng Branch chuan Bazarveng Branch hnehin an champion thung a. Mipa champion team hian trophy leh pawisa fai ₹20,000/- dawngin, runner-up hian trophy leh ₹15,000/- an dawng a. Veteran-ah champion-in trophy leh ₹15,000/- dawngin, runner-up-in trophy leh ₹10,000/- an dawng thung a ni.

Men's Fair Play Award chu Farm Veng Branch-in dawngin, Veteran Fair Play Award chu Electric Veng Branch-in an dawng a. Fair Play Award hian trophy leh pawisa fai ₹ 3,000/- a keng tel a. Hei bakah hian mimal lawmman - best player, top scorer leh best goalkeeper lawmman te siam a ni bawk.