4443/2024-2025

Aizawl, February ni 26, 2025: PHED Minister Prof. Lalnilawma chuan tukin khan Tlawng Lui (Reiek Kai) a tui kam khuahna Temporary Barrage siam hna a hmunah a enfiah. PHED Minister Aizawl West III bialtu MLA Pu V.L. Zaithanzama pawh telin, PHE Department hotuten an tawiawm a ni.

Aizawl khawpui chawmtu Tlawng Lui chu a kum tela a kam zel avangin kum 2022 atang khan thal intan tak tak hma in tui khuah nan Temporary Barrage siam kumtin thin a ni a. Tukin khan Minister ho hian he barrage siam hna hi enho a ni. Barrage hi 2.5 metre a sang a siam thin a ni a, hei hian metre 350 vel tui tling tura beisei a ni.

Minister chuan PHED hotute nen hmalakna leh ruahmanna dang awmte a sawipui a. Tui supply lama hmasawnna tura ruahmanna hrang hrang te ngun taka ngaihtuah chungin chak taka hmalak zel a nih tur thu a sawi a ni.

April ni 9, 2021 khan Greater Aizawl Water Supply Scheme Phase-I leh Phase-II atanga Aizawl khawpui chawm tura 38 MLD mamawh a nih laiin 31.461 MLD ah a tla thla a. Khami hnu atang khan kawng hrang hrangin hmalak a ni ta a. Temporary barrage siam hian thal khaw ro tak tak lai kar khat vel tla tur tui a khawl thei thin a ni. PHED lamin an tehna atangin erawh kumin 2025 hi Tlawng lui tui a la tlem ber tura ngaih a ni.