2062/2024-2025
2024 Mimkut thla ni 13: Lunglei Officers' Club (LOC) chuan vawiin chawhnu khan Lunglei Government College (LGC)-ah zirlaite an hma lam hun atana kaihhruaina leh kawng kawhhmuhna, 'career awareness programme' an buatsaih.
LGC Multipurpose Hall-a LOC career awareness programme buatsaihah hian resource person pathum - Maj. Rebecca L. Chhakchhuak, District Sainik Welfare & Resettlement Officer, Lunglei; Pi Jennifer Vanlalhruaii Pachuau MCS, Settlement Officer, Land Revenue & Settlement, Lunglei leh Pi Christina Lalchhanhimi Sailo, Assistant Manager, Mizoram Rural Bank, Lunglei Branch te'n competitive exam hrang hrang - sipai, civil service leh banking, etc. hmachhawn tura hriat tur pawimawh hrang hrang an zirtir a. Zirlaite an zir lai leh zir zawh hnua an inbuatsaih dan tur te, hna vang tawh tak kara inelna hmachhawn thei tur leh mahni kutkawiha ei zawnna bul ṭan thei tura rilru put hmang dik leh nunphung ṭha te an zirtir bawk a. Zawhna leh chhanna hun hman a ni bawk.

He hun hi President Pu Francis Lalnuntluanga Ralte MPS, Commandant, 2nd Bn MAP hovin LOC OB leh Executive Committee Member eng emaw zatin an hmanpui a. Nl. H. Lallawmzuali'n hun kaihruaiin, zirtirtute uapna hnuaiah LGC-a V Semester zirlaite'n career awareness programme hi an chhim a ni.

Lunglei Officers' Club hi Lunglei municipal area chhunga central/state sawrkar hna thawk group 'A' officer-te'n anmahni hna pangngai piah lama ram leh khawtlang tana rawng bawlna zau zawk an neih theih nana an intel khawmna niin, December ni 18, 2023 khan din a ni a. Tunah hian member 109 an awm mek a ni.

LOC hian nikum Krismas vuakvetah khan mi harsate leh ṭanpui ngaite ṭanpui nan charity concert an buatsaih bakah, kumin khan HSSLC exam-a Lunglei aṭanga top ten-a lang zirlaite chawimawina an buatsaih bawk a. Career awareness programme hi Lungleia zirna in hrang hrangah la buatsaih chhunzawm zel an tum a ni.

Attachment

  • Loading attachment...