2063/2024-2025

2024 Mimkut thla ni 13: Vawiin khan Lunglei District Disaster Management Authority (DDMA) chuan Lunglei District-a chhawmdawlna in 7 leh sikul 7 hnenah kang ṭhelhna hmanrua, fire extinguisher pakhat ṭheuh an hlan.

Lunglei DC Conference Hall-a fire extinguisher inhlanna inkhawm buatsaih hi Lunglei Sub-Deputy Commissioner Pi Lalhlimpuii Pachuau chuan kaihruaiin, Additional Deputy Commissioner & DDMA Chief Executive Officer Pu James Miahlung chuan DDMA hma lakna report a pe a. Fire extinguisher chu kum 2023 State Fire Prevention Week-a Lunglei District-in Mizoram district-te zinga kangmei veng ṭha ber lawmman ₹ 50,000/- a dawn aṭanga lei a nih thu sawiin, Lunglei khawpui chhung hmun eng emaw zatah kangmei chhuah thulha kang ṭhelhtute'n awlsam taka tui an lak theihna tur fire hydrant bun turin proposal siam a nih thu a tar lang bawk a. Chhiatna chu eng tik hun pawha thleng thei a nih avangin a invenna lam ngaih pawimawh a ṭul hle a ni, a ti.

Lunglei District Superintendent of Police Pu J. Lalmuankima chuan kangmei chhuak reng reng a nasat hmaa ṭhelh a pawimawh thu sawiin, chuti ang atan chuan fire extinguisher chu ban mai awlsama dah a pawimawh thu a sawi a. Kangmei chuan chhiatna nasa tak a thlen theih avangin fimkhur a ṭul tiin, fire extinguisher dawngtute chu an thil dawnah duh tawk mai lo va, a taka hman a ṭul huna hmang thei tura a hman dan zir turin a chah a ni.

He hunah hian Fire & Emergency Services, Lungleia official-te aṭangin fire extinguisher hman dan tur inkawhhmuhna ngaihthlak a ni a. SP, Additional DC, DIPRO, SDO PHED leh SDC te'n fire extinguisher-te chu a dawngtu home leh sikulte hnenah an hlan a ni.