DIRECTORATE OF INFORMATION & PUBLIC RELATIONS, Government of Mizoram, India

4424/2024-2025

Lunglei, 2025 Ramtuk thla ni 25: India sawrkar Ministry of Minority Affairs hnuaia Pradhan Mantri Jan Vikas Karyakram (PMJVK) Scheme 2020-2021 kal tlanga cheng nuai 127.38 senga sak, Lunglei Lunglawna Community Service Centre (CSC) chu vawiin khan Lunglei South bialtu MLA Pu Lalramliana Papuia'n a hawng.

Lunglei South bialtu MLA Pu Lalramliana Papuia chuan a bial chhung Lunglawna CSC ṭha tak sak zawh leh hawn theih a ni ta chu lawmawm a tih thu sawiin, bul ṭantu sawrkar hmasa chungah leh Sports Minister leh bialtu MLA hmasate chungah lawm thu a sawi a. CSC chu Lunglawn khawtlang mai bakah Lunglei pum puiin ṭangkai taka an hman a beisei thu sawiin, infiamna kawngah ṭhalaite hmasawn nan ṭangkai taka hman a nih chuan a hluin a chhenfakawm hle ang, a ti.

Pu Lalramliana Papuia chuan infiamna kawnga hmasawn nan Mizoram sawrkar chuan Sports & Youth Services Department leh Mizoram State Sports Council (MSSC) kal tlangin nasa takin hma a la tih sawiin, Mizoram Bana Kaih Scheme hnuaiah infiamna tihhmasawnna tur, "Empowering Mizoram Sports" kalpui a nih thu leh "Vision 2036" tiin kum 2036 Olympics-ah Mizo ṭhalai tam zawk an inlan theih nan hmathlir neia hma lak chhoh mek a nih thu a sawi a. Sawrkar leh department-in ṭhalaite hmakhua tur ngaihtuahin, infiamna hmunhma leh hmanrua (infrastructure) lama hmasawnna tur hma lakna pawh kalpui mek a ni tiin, project kal lai 56 vel a awm mek tih a tar lang a. Hmasawnna hna thawhah mipuiin dikna leh chanvo kan neih rualin tih tur leh mawhphurhna kan nei tel a, sawrkarin infiamna hmunhma leh hmanraw ṭha min siamsak chu intihhlimna leh hun awl khawh ralna atan mai ni lovin, hlawhtling tura inchherna leh ram tihmingṭhatu ni tura hmanraw ṭangkai atan hman a pawimawh, a ti a. Chuti ang taka hmang tur chuan ṭhalaite leh khawtlang mipuite a chah a ni.

Lunglei South bialtu MLA Pu Lalramliana Papuia chuan Lunglawn khawtlang hruaitu (local council) atana thlan tharte lawmpuina leh duhsakna hlanin, khawtlang hmangaihna tak tak nen khawtlang hmasawnna tura theih tawp chhuah turin a chah a. Khawtlang mamawh mila hmachhawp leh hma lakna ruahman thiam a pawimawh thu sawiin, party mite inhlawhna tur rilru aia khawtlang leh mipuite mamawh anga hmasawnna ruhrel leh hna ruahman chu sawrkar rilru a nih thu a sawi a. Khawtlang hruaitute chu hmasawnna hna thawh awm reng reng vil leh en zui peih tur leh hna ṭha siam zel tum tura chahin, hmasawnna hna thawhah duh khawp loh lai a awm pawhin thil awmzia hre chiang lova social media-a theh darh nghal ngawt a ṭhat loh thu leh chu chuan thawh hona a tihbuai theih thu te, a siam ṭha theitute hnena thlen nachang hriat a pawimawh thu te sawiin, thil ṭha, fel leh chhenfakawm a awm theih nan khawtlang hruaitute chu theih tawpa hma lakpui a inhuam thu a sawi.

He hun hi Lunglei District Sports & Youth Officer Pu K. Lalthlengliana'n a kaihruai a. Upa F. Lalzarmawia (BCM) chuan hunserh hmangin, MSSC-a Assistant Engineer Pu James Lalramnghaka'n CSC thar hawn tak chungchang technical report a pe a. Lunglei Municipal Council (LMC)-a Executive Councillor Pu Zorinsanga Hmar pawhin thu sawiin, Lunglawn LC Vice Chairman Pu C. Laltlanthanga'n lawm thu sawiin hun a khar a ni.

CSC Lunglawn, Lunglei District sakna atan hian India sawrkar Ministry of Minority Affairs hnuaia Pradhan Mantri Jan Vikas Karyakram (PMJVK) Scheme 2020-2021 kal tlangin cheng nuai 140 dawn a ni a; central share hi 90% (cheng nuai 126) niin, state share hi 10% (cheng nuai 14) a ni a. Hna thawk tur hian tender chhuah a nih hnuah M/s Excell Consultancy Services, Mission Veng Aizawl te thlan niin, Work Order amount hi cheng nuai 127.38 a ni a. July ni 22, 2022 khan hna thawh ṭan niin, September ni 12, 2024 khan ṭha taka zawh fel a ni.

He building hi chhawng hniha sak niin, a hnuai zawk hi a dung metre 16 leh a vang metre 3-a zau a ni a. Pindan (room) pali (4) ruahman niin, toilet dah tel a ni bawk a. Ground floor hi a dung metre 16 leh a vang metre 9 niin, Multipurpose Hall atana ruahman a ni a. Puipunna hmun atan bakah, sports discipline hrang hrangte pawh he hmunah hian khelh theih a ni ang. A chhungah hian MSSC chuan plastic chair 80, dawhkan 3 leh steel almirah 1 an dah nghal bawk a ni.

Attachment