2177/2025-2026

Lunglei, 2025 Sahmulphah thla ni 12: Vawiin khan Lunglei Town Planning & Development Committee chu Lunglei Municipal Council (LMC) BoC Hall-ah ṭhu khawmin, ram awm dan leh mihring pun zel dante thlir chunga Lunglei khawpui ruangam leh hmasawn dan tur ruahmanna, "Geographic Information System (GIS)-Based Lunglei Master Plan" chungchang an sawi ho.

Ṭhut khawm hi LMC Vice-Chairman Pu K. Lalrinawma’n kaihruaiin, LMC Councillor-te, LMC huam chhunga Local Council Chairman-te leh department hrang hrang ai awhte an tel a. AMRUT 2.O hnuaia GIS-Based Master Plan siamtu tur consultant, Spatial Decisions leh Urban Development & Poverty Alleviation (UD&PA) Town & Country Planning Wing aṭangin Deputy Director Pi R. Lalhmangaihzuali te'n presentation pein, Master Plan kalpui dan tur thlir ho a ni.

Risk-Informed GIS-Based Master Plan for Lunglei Town hnuaiah hian kum 2045 thlirin Lunglei khawpui tan Master Plan duan a ni a. Khawpui ṭhan zel dan tur leh hmasawnna hna thawhte felfai leh awmze nei taka kalpui a nih theih nan tun dinhmun zir chianna (survey leh data collection) uluk taka kalpuiin, mipui leh department-te nena inrawn chunga ruahmanna siam tum a ni a. Kumin 2025 chhung ngeiin in tina kal chilha zir chianna (household survey) zawh fel hman tum a ni.