1153/2025-2026

Lunglei, 2025 Vawkhniahzawn thla ni 11: Vawiin khan Lunglei Government College (LGC) chuan an College RUSA Hall-ah kumin Mizoram University (MZU) under graduate result chhuaka an zirlai ti ṭhate chawimawina hun, 'Award & Felicitation Ceremony for Outstanding Achievers 2025' buatsaihin, an College aṭanga top 10-a langte leh an zirlai bika subject mala mark hmu sang berte hnenah lawmpuina thuziak leh pawisa fai an hlan a. Lunglei West bialtu MLA Pu T. Lalhlimpuia chuan khuallian niin hun a hmanpui.
Khuallian Pu T. Lalhlimpuia chuan zirlai hlawhtlinna chang tharte lawmpuina leh duhsakna hlanin, ram leh khawtlang tana mi chhenfakawm ni turin theih tawp chhuah zui zel turin a chah a. An hlawhtlinna phena mi pawimawh tak chu zirtirtute an ni tih sawiin, zirtirtute hlutna leh ropuina lan chhuahna chu an mi chher chhuahteah a nih angin zirlaite chu an zirtirtute chawimawitu ni thei tura ṭan la zel turin a fuih a. Ram leh khawtlang hmasawn nan mi thiam chhawr tlak an pawimawh thu sawiin, chuti ang ki chhe chhuak tur chuan ngaih hlut tur dik te, rual elna rilru te, mahni hna ngaih pawimawh leh tihtak taka thawh te inzirtir thar a ṭul thu a sawi a. Zirlaite chu tun lai thiamnain remchanna tam tak a pek chhawr ṭangkai a, rual elna rilru nen hlawhtling ngei tura zir turin a chah a ni. 
LGC-a zirlai ti ṭhate chawimawina inkhawm hi Associate Professor Dr F. Lalchhanhima'n kaihruaiin, Principal Pu Lalrammuana Chawngthu chuan thu a sawi a. Merit Award Committee Secretary, Assistant Professor Pu Zonunsanga Colney kaihhruaiin chawimawina inhlanna hun buatsaih niin, chawimawina dawngtute, sawm bikte leh zirtirtute aṭangin thu sawi ngaihthlak a ni bawk a. Assistant Professor Pu HT Lalzamliana'n lawm thu sawiin hun a khar a ni.
MZU Undergraduate Result 2025-a Lunglei Government College aṭanga top 10-a lang, vawiina chawimawina hlante chu:

(1) K. Vanlallawmzuali, Bachelor of Science (Chemistry) - 3rd Rank
(2) Lallianmawia Hrahsel, Bachelor of Science (Zoology) - 6th Rank
(3) V. Lalbeiseii, Bachelor of Science (Zoology) - 9th Rank
(4) Lalremliani Khiangte, Bachelor of Science (Zoology) - 10th Rank

Rank holder-te hi LGC Principal kal chhuak ta, Pu C. Zairemthanga hnen aṭanga lawmpuina pawisa fai dawn chu hlan an ni bawk.

Hei bakah hian a hnuaia mi ang hian Department tina mark hmu sang berte hnenah chawimawina hlan a ni bawk:

(1) Rebek Lalpekhlui (Education) - 7.84 CGPA
(2) Lalrohluzuali (Political Science) - 8.05 CGPA
(3) Elizabeth Lalengmawii (Economics) - 7.60 CGPA
(4) R.Vanlalzawmpuii (Geography) - 7.80 CGPA
(5) MC Rodingpuii (Mizo) - 7.21 CGPA
(6) Brigid Lalhmangaihsangi (History) - 7.67 CGPA
(7) Esther Lalnunhlimi Khiangte (English) - 7.00 CGPA
(8) Lalzahawmi Chinzah (Philosophy) - 6.11 CGPA
(9) V. Lalsawmliana (Mathematics) - 7.63 CGPA
(10) Ronunmawii (Botany) - 7.61 CGPA
(11) F.Lalrinfeli (Geology) - 7.51 CGPA

Lunglei Government College hi September ni 10, 1964 khan Gauhati University-a inziak lutin din a ni a. Diamond Jubilee lawm tawhin, tunah hian zirtirtu (teaching staff) mi 64 an thawk mek a. Bachelor of Arts (BA) leh Bachelor of Science (BSc) zirna awmin, subject/department 14 a awm a. Kumin hian zirlai 861 (BA 714 leh BSc 147) an nei a ni.

Attachment

  • Loading attachment...