346/2025-2026

Lunglei, 2025 Ṭau thla ni 26: Lunglei District Administration hma laknaa Lunglei District-a vohbikte chawi kanna tur ruahmanna - Project LEAP (Lunglei’s Empowerment for Access and Equity for all Persons) hnuaia April ni 22 aṭanga ni 26, 2025 chhunga Lunglei Civil Hospital-a vohbikte tana hriselna dinhmun endikna, health assessment camp thawh khatna buatsaih chu vawiin khan ṭiakin, assessment camp buatsaih chhung hian inentir mi 588 leh ALIMCO (Artificial Limbs Manufacturing Corporation of India) aṭanga a thlawna ṭanpuina hmanraw dawn tur dil mi 484 an awm.

Project LEAP hnuaia vohbikte tana health assessment camp buatsaihah hian doctor specialist hrang hrangte'n vohbikte hriselna dinhmun hi enfiahin, an dinhmun leh harsatna azirin Disability Certificate/Unique Disability ID (UDID) siamsak an ni a. Ni 5 chhung hian Lunglei Municipal Council (LMC) huam chhung aṭangin vohbik 553 leh LMC pawn lam aṭangin vohbik 35, an zavaiin vohbik 588 an inentir a ni.

Hemi chhung hian vohbik 40% chung lam disability nei, UDID nei tawhte leh upa kum 60 chung lamte tan ALIMCO te chuan ṭanpuina hmanraw chi hrang hrang - wheelchair, bengdar, mitdel tiang, zakdawh tiang leh hmanraw dangte dawng thei tur enfiahna (assessment) an buatsaih nghal bawk a. Mi 484-in assessment camp chhung hian ṭanpuina hmanrua hi an dil a ni.

Project LEAP hma lakna hnuaiah hian health assessment camp hi Lunglei District chhung thingtlang khaw lamah te pawh la buatsaih chhunzawm zel tum a ni.