885/2025-2026

Lunglei, 2025 Nikir thla ni 23: 2 Mizo Battalion National Cadet Corps (NCC), Lunglei huaihawtin ni 21 zing khan 'International Day of Yoga' ṭum 11-na chu 'Yoga for One Earth, One Health' (Khawvel leh mihring ṭhat tlan nan yoga) tih thupui hmangin Lungleia C. Ṭhuamluaia Mualah hlawhtling taka lawm a ni.

Lungleia yoga puala ni bik hmannaah hian Lunglei District Bawrhsap Pi Navneet Mann, Superintendent of Police Pu J. Lalmuankima, DIPRO Pu C. Lalhruaitluanga, 166 TA Bn OC Lt Col. Prashant Kakade leh ECHS Lunglei OC Col. Arun Sharma te'n hun an hmanpui a. 2 Mizo Bn NCC hotute, zirtirtute leh zirlai naupang (cadet) 200 chuang nen ṭiauchhum leh ruah hmi karah yoga hmanga insawizawina hun hi an hmang ho a ni.

G21 Fitness Centre dintu, certified trainer Miss Gracy leh a thawhpuite chuan yoga hmanga insawizawi dan entirin, anni kaihhruai hian yoga hmanga insawizawi dan hrang hrangin kal khawmte chu a rual tlangin an insawizawi a. Insawizawi pah hian taksa leh rilru hriselna atana yoga ṭhatna leh ṭangkainate zir ho nghal a ni.

Lungleia International Day of Yoga 2025 hmannaah hian Lunglei Government College, Govt J. Buana College, GHS Lunglei, GHSS Lunglei, Sacred Heart School, Venglai High School, 2nd MAP School Lunglei, Baptist HSS Serkawn, Adventist English School, KV Lunglei, EMRS Pukpui leh JNV Pukpui aṭangin NCC cadet leh zirtirtute an tel a ni.

Bawrhsap leh SP te'n yoga session kaihruaitu Miss Gracy leh a thawhpuite hnenah lawm thu sawina thilpek an hlan a. 2 Mizo Bn NCC Commanding Officer Col. Sagar K. Mohanty chuan lawm thu sawiin hun a khar a ni.

United Nations (UN) chuan kum 2014 khan June ni 21 hi yoga pual ni bik, 'International Day of Yoga' atan puangin, kum 2015 aṭang khan khawvel pumah he ni hi kum tin June ni 21-ah hman ṭhin a ni.